اسلام آباد: پاکستان سپر لیگ (پی ایس ایل) سیزن 10 کی شاندار تقریبات کا آغاز آج سے ہو رہا ہے، جب راولپنڈی کرکٹ اسٹیڈیم میں لیگ کی افتتاحی تقریب منعقد کی جائے گی۔
تقریب کا آغاز شام 7 بجے ہوگا، جس میں نامور گلوکار اپنی پرفارمنس سے شائقین کے جوش و خروش کو دوبالا کریں گے۔
افتتاحی تقریب کے فوراً بعد سیزن کا پہلا میچ کھیلا جائے گا، جس میں دفاعی چیمپئن اسلام آباد یونائیٹڈ کا مقابلہ لاہور قلندرز سے ہوگا۔ یہ میچ پنڈی کرکٹ اسٹیڈیم میں منعقد ہوگا اور شائقین کرکٹ کو ایک زبردست ٹاکرا دیکھنے کو ملے گا۔
ادھر راولپنڈی اور اسلام آباد میں پی ایس ایل کے پیش نظر ٹریفک پلان بھی جاری کیا گیا ہے۔ مختلف روٹس پر ٹریفک کی آمدورفت جزوی طور پر معطل رہے گی، جبکہ 300 سے زائد ٹریفک اہلکار تعینات کیے گئے ہیں تاکہ سڑکوں پر روانی برقرار رکھی جا سکے۔
مری روڈ سے سرینا اور فیض آباد تک آمدورفت بند رہے گی جبکہ ایکسپریس وے، مری روڈ، فیصل ایونیو اور سری نگر ہائی وے پر سخت سیکیورٹی انتظامات کیے گئے ہیں۔ شہریوں کو ایچ ایٹ انڈرپاس استعمال کرنے کی ہدایت کی گئی ہے۔
ٹریفک پولیس نے شہریوں کو مشورہ دیا ہے کہ وہ سیکٹر آئی اور ایچ کی طرف جانے کے لیے آئی جے پی روڈ سے سروس روڈ اختیار کریں جبکہ بری امام جانے والے افراد نادرا چوک کا راستہ اپنائیں۔
