راولپنڈی: ایچ بی ایل پاکستان سپر لیگ (پی ایس ایل) سیزن 10 کے افتتاحی میچ میں دفاعی چیمپئن اسلام آباد یونائیٹڈ نے لاہور قلندرز کو باآسانی 8 وکٹوں سے شکست دے کر ایونٹ کا فاتحانہ آغاز کر دیا۔
راولپنڈی کرکٹ اسٹیڈیم میں کھیلے گئے میچ میں اسلام آباد یونائیٹڈ نے ٹاس جیت کر پہلے فیلڈنگ کا فیصلہ کیا۔ لاہور قلندرز کی ٹیم آخری اوور میں 139 رنز پر آل آؤٹ ہو گئی۔
لاہور قلندرز کی اننگز
قلندرز کی جانب سے عبداللہ شفیق نے شاندار 66 رنز کی اننگز کھیلی جس میں 3 چھکے اور 6 چوکے شامل تھے۔ سکندر رضا نے 23 رنز بنائے، جبکہ حارث رؤف 10 اور محمد نعیم 8 رنز کے ساتھ نمایاں رہے۔
دیگر بلے بازوں میں شاہین آفریدی اور آصف آفریدی نے 2،2 رنز بنائے جبکہ سیم بلنگز، جہانداد خان اور ڈیوڈ ویسا بغیر کوئی رن بنائے پویلین لوٹ گئے۔ اسلام آباد یونائیٹڈ کی جانب سے جیسن ہولڈر نے شاندار بولنگ کرتے ہوئے 4 وکٹیں حاصل کیں۔
اسلام آباد یونائیٹڈ کی اننگز
140 رنز کے ہدف کا تعاقب کرتے ہوئے اسلام آباد یونائیٹڈ نے صرف 2 وکٹوں کے نقصان پر ہدف 18ویں اوور میں حاصل کر لیا۔
ٹاپ آرڈر بیٹر کولن منرو نے 42 گیندوں پر ناقابل شکست 59 رنز بنائے، جس میں 1 چھکا اور 7 چوکے شامل تھے۔ ان کا ساتھ آغا سلمان نے دیا، جو 41 رنز بنا کر ناٹ آؤٹ رہے۔
اوپنر صاحبزادہ فرحان نے 24 گیندوں پر 25 رنز اسکور کیے جن میں 3 چھکے شامل تھے۔ لاہور قلندرز کی جانب سے آصف آفریدی اور حارث رؤف نے ایک ایک وکٹ حاصل کی۔
