وزیراعلیٰ پنجاب مریم نواز شریف نے ترکیہ کے صدر رجب طیب ایردوآن سے ملاقات کی۔ اس موقع پر خاتون اول محترمہ امینے ایردوآن بھی موجود تھیں۔
صدر ایردوآن نے مریم نواز کا پرتپاک خیرمقدم کرتے ہوئے ڈپلومیسی فورم 2025 میں شرکت پر شکریہ ادا کیا اور سابق وزیر اعظم محمد نواز شریف کی صحت کے بارے میں دریافت کرتے ہوئے نیک تمناؤں کا اظہار کیا۔
صدر ایردوآن نے کہا کہ “جلد نواز شریف سے ملاقات ہوگی، ان شاء اللہ”۔ مریم نواز نے ترکیہ کے صدر کو نواز شریف کی جانب سے خیرسگالی کا پیغام بھی پہنچایا اور دورے کی دعوت پر شکریہ ادا کیا۔
وزیراعلیٰ مریم نواز آج ڈپلومیسی فورم 2025 سے خطاب کریں گی، جس کا عنوان ہے:
“تقسیم دنیا میں مستقبل کی تعمیر – تعلیم: تبدیلی لانے کی ایک طاقت”
اپنے خطاب میں وہ پنجاب میں تعلیم کے فروغ کے لیے حکومت کے اقدامات اور اپنی جماعت کے منشور پر روشنی ڈالیں گی۔
