کراچی: شہر میں دن کے اوقات کے دوران ہیوی ٹریفک کے داخلے پر مکمل پابندی عائد کر دی گئی ہے۔ کمشنر کراچی کی جانب سے جاری نوٹیفکیشن کے مطابق شہر میں ہیوی ٹریفک پر دفعہ 144 نافذ کر دی گئی ہے، جس کا اطلاق 17 اپریل سے 16 جون 2025 تک ہوگا۔
نوٹیفکیشن میں واضح کیا گیا ہے کہ صبح 6 بجے سے رات 10 بجے تک کسی بھی ہیوی گاڑی کو شہر میں داخلے کی اجازت نہیں ہوگی۔ اس پابندی کا اطلاق تعمیراتی سامان لے جانے والے ڈمپرز پر بھی ہو گا۔
پابندی کا فیصلہ ڈی آئی جی ٹریفک کی سفارش پر کیا گیا ہے تاکہ ٹریفک کی روانی کو بہتر بنایا جا سکے اور شہریوں کو روزمرہ کے سفر میں درپیش مشکلات کم ہوں۔
نوٹیفکیشن میں متبادل راستوں کی نشاندہی بھی کی گئی ہے۔ ہیوی ٹریفک کو سپر ہائی وے سے نیو کراچی انڈسٹریل ایریا براستہ سلپ روڈ، نیشنل ہائی وے سے گودام چورنگی، منظر پیٹرول پمپ، یونس چورنگی اور داؤد چورنگی سے جام صادق تک رسائی دی جائے گی۔ اسی طرح ناردرن بائی پاس سے پراچہ چوک، اسٹیٹ ایونیو، سیمینز چورنگی سے گلبائی اور ماڑی پور روڈ تک ہیوی ٹریفک کی آمدورفت کی اجازت ہو گی۔
