کراچی: نیشنل گیمز کا انعقاد ایک بار پھر تاخیر کا شکار ہوگیا۔ سندھ اولمپکس ایسوسی ایشن نے نیشنل گیمز ملتوی کرنے کا باضابطہ اعلان کردیا ہے۔ اس حوالے سے متعلقہ اداروں کو ایک خط جاری کیا گیا ہے جس میں بتایا گیا ہے کہ ناگزیر وجوہات کے باعث گیمز ملتوی کیے جا رہے ہیں۔
نیشنل گیمز کا انعقاد یکم مئی سے کراچی میں ہونا تھا، جس کی میزبانی سندھ کو 18 سال بعد ملی تھی۔ تاہم ذرائع کے مطابق شدید گرمی، ہیٹ ویو اور انٹرمیڈیٹ امتحانات کے باعث گیمز ملتوی کیے گئے۔ ناقدین کا کہنا ہے کہ مئی میں گرمی اور امتحانات کا پہلے ہی سے علم تھا، اس کے باوجود ان تاریخوں کا انتخاب سوالیہ نشان ہے۔
ذرائع کے مطابق نیشنل گیمز کے انتظامات بھی مکمل نہیں کیے جا سکے تھے۔ کئی کھیلوں کے میدان اور اسپورٹس کمپلیکس اپ گریڈ نہیں ہوئے، لوگو اور ٹارچ ریلے بھی تیار نہیں کی گئی۔ اس سے قبل ان گیمز کا انعقاد فروری میں ہونا تھا، جو ملتوی کر کے مئی میں کرنے کا فیصلہ کیا گیا تھا، لیکن اب مئی کی تاریخیں بھی منسوخ کر دی گئی ہیں۔
سندھ اولمپکس ایسوسی ایشن کا کہنا ہے کہ نیشنل گیمز کی نئی تاریخوں کا اعلان بعد میں کیا جائے گا۔
