کراچی: اینٹی نارکوٹکس فورس (اے این ایف) نے مختلف شہروں میں کامیاب کارروائیاں کرتے ہوئے ساڑھے 5 کروڑ روپے سے زائد مالیت کی منشیات برآمد کر کے 8 ملزمان کو گرفتار کرلیا۔ ترجمان اے این ایف کے مطابق یہ کارروائیاں تعلیمی اداروں اور دیگر شہروں میں منشیات کی سمگلنگ کے خلاف کریک ڈاؤن کے تحت کی گئیں۔
کارروائیوں کے دوران مجموعی طور پر 140.513 کلو گرام منشیات برآمد ہوئیں۔ پشاور کے باغ ناران پارک کے قریب گاڑی سے 2 کلوگرام چرس، 500 عدد ایکسٹی گولیاں اور ایک پستول برآمد کیا گیا جبکہ تین ملزمان کو گرفتار کرلیا گیا۔ گرفتار شدگان نے تعلیمی اداروں کے طلبہ کو منشیات فروخت کرنے کا اعتراف بھی کیا ہے۔
حیات آباد پشاور میں ایک کوریئر آفس میں جھنگ بھیجے جانے والے پارسل سے 30 ایکسٹی گولیاں برآمد ہوئیں، جب کہ لاہور کے گلبرگ میں آسٹریلیا بھیجے جانے والے پارسل سے 8 کلو 400 گرام آئس پکڑی گئی۔ کالا شاہ کاکو ٹول پلازہ لاہور کے قریب ایک ٹرک سے 14 کلو 400 گرام افیون اور 34 کلو 800 گرام چرس برآمد کرکے تین مزید ملزمان کو حراست میں لیا گیا۔
کراچی میں سپر ہائی وے پر بسم اللہ مارکیٹ کے قریب ایک بیگ سے 13 کلو 200 گرام چرس برآمد ہوئی۔ حیدر آباد کے علاقے قاسم آباد میں ایک مسافر بس میں سوار ملزم سے 8 کلو 400 گرام چرس برآمد کی گئی۔ حب (بلوچستان) کے علاقے وندر میں ایک غیر آباد جگہ سے 41 کلو افیون اور 18 کلو ہیروئن بھی برآمد کی گئی۔
ترجمان اے این ایف کے مطابق گرفتار تمام ملزمان کے خلاف انسداد منشیات ایکٹ کے تحت مقدمات درج کر کے مزید تحقیقات کا آغاز کردیا گیا ہے۔
