نئی دہلی: بھارت میں اقلیتوں بالخصوص مسلمانوں کے خلاف بڑھتی ہوئی انتہاپسندی ایک بار پھر سفاکی کی حدوں کو چھو گئی، جب ایک مسلم خاتون کو ہندو انتہاپسندوں کے گروہ نے سرعام ظلم و ستم کا نشانہ بنایا۔
ذرائع کے مطابق یہ افسوسناک واقعہ بھارتی ریاست میں پیش آیا، جہاں ایک نہتی مسلم خاتون پر جان بوجھ کر کتا چھوڑا گیا۔ عینی شاہدین کا کہنا ہے کہ کتا خاتون کو مسلسل کاٹتا رہا اور آس پاس کھڑے انتہاپسند ہندو اس ظالمانہ منظر سے محظوظ ہوتے رہے۔ کسی نے بھی خاتون کی مدد کرنے کی کوشش نہیں کی۔
واقعے کی ویڈیو سوشل میڈیا پر وائرل ہونے کے بعد عوام میں شدید غم و غصے کی لہر دوڑ گئی ہے۔ مختلف مکاتب فکر کے مذہبی اسکالرز نے اس واقعے کو انسانیت کے خلاف سنگین جرم قرار دیتے ہوئے کہا کہ کسی بھی مذہب یا انسانیت کے اصول ایسے سلوک کی اجازت نہیں دیتے۔
علماء کا کہنا ہے کہ قرآن مجید مسلمانوں کی عزت و حرمت کے تحفظ کا حکم دیتا ہے اور ایسے مظالم پر خاموش رہنا ظلم کا ساتھ دینے کے مترادف ہے۔ انہوں نے عالمی انسانی حقوق کی تنظیموں اور اقوام متحدہ سے مطالبہ کیا ہے کہ وہ اس واقعے کا سخت نوٹس لیں اور بھارت میں اقلیتوں کے تحفظ کے لیے فوری اقدامات کریں۔
