کراچی: پاکستانی اداکارہ رابعہ کلثوم نے حالیہ پاک بھارت کشیدگی کے پس منظر میں بھارتی فلم انڈسٹری میں کام کرنے والے پاکستانی فنکاروں کے خلاف سخت مؤقف اختیار کرتے ہوئے جذباتی ردعمل کا اظہار کیا ہے۔
رابعہ کلثوم نے اپنی انسٹاگرام اسٹوری میں تحریر کیا کہ اگر اب کسی پاکستانی اداکار نے بھارت میں کام کرنے کی کوشش کی تو وہ اسے “چپیڑیں” ماریں گی۔ انہوں نے مزید کہا:
“پہلا ٹماٹر منہ پر میں ماروں گی، وہ چاہے کوئی بھی ہو۔”
اداکارہ نے اس تاثر کو بھی مسترد کر دیا کہ “فن کی کوئی سرحد نہیں ہوتی”، اور اس فلسفے کو “شِٹ” قرار دیتے ہوئے حکومت سے مطالبہ کیا کہ وہ اس حوالے سے واضح قانون سازی کرے تاکہ پاکستانی فنکاروں کو بھارت میں کام سے روکنے کا بندوبست کیا جا سکے۔
یاد رہے کہ حالیہ پاک بھارت کشیدگی کے بعد بھارتی حکومت اور انتہا پسند عناصر کے دباؤ پر بھارتی فلم انڈسٹری میں پاکستانی فنکاروں کے لیے دروازے بند کر دیے گئے ہیں۔ اداکار فواد خان کی نئی فلم “عبیر گلال” کی ریلیز روک دی گئی ہے جبکہ وانی کپور نے فواد خان کے ساتھ اپنی تمام تصاویر سوشل میڈیا سے ہٹا دی ہیں، جو بھارت میں موجود خوف کی فضا کی عکاسی کرتی ہے۔
رابعہ کلثوم، جو سینئر اداکارہ پروین اکبر کی بیٹی، فیضان شیخ کی بہن اور ماہم عامر کی نند ہیں، متعدد ڈراموں، ویب سیریز، فلموں اور میوزک ویڈیوز میں اپنی اداکاری کے جوہر دکھا چکی ہیں۔ انہوں نے اپنے کیریئر کا آغاز جیو ٹی وی کے ڈرامہ “زمانی منزل کے مسخرے” سے کیا تھا۔
