اسلام آباد: وفاقی حکومت نے معرکہ بُنْيَانٌ مَّرْصُوْص میں تاریخی کامیابی اور افواجِ پاکستان کو خراج تحسین پیش کرنے کے لیے 16 مئی بروز جمعہ کو ملک بھر میں یومِ تشکر منانے کا اعلان کر دیا ہے۔
وفاقی اعلامیے کے مطابق دن کا آغاز ملک بھر کی مساجد میں قرآن خوانی اور خصوصی دعاؤں سے کیا جائے گا۔ وفاقی دارالحکومت اسلام آباد میں 31 توپوں جبکہ تمام صوبائی دارالحکومتوں میں 21 توپوں کی سلامی دی جائے گی۔
ذرائع کے مطابق مزارِ قائد کراچی اور مزارِ اقبال لاہور پر گارڈز کی تبدیلی کی پروقار تقاریب منعقد ہوں گی، جبکہ پرچم کشائی کی تقریبات بھی وفاقی و صوبائی سطح پر ہوں گی۔
ملک بھر میں یادگارِ شہداء پر پھول چڑھائے جائیں گے اور دعائیہ تقریبات کا انعقاد کیا جائے گا۔ اس کے ساتھ ساتھ آپریشن بنیان مرصوص کے شہداء کے لواحقین سے خصوصی ملاقاتیں بھی کی جائیں گی تاکہ ان کی قربانیوں کو خراجِ تحسین پیش کیا جا سکے۔
یوم تشکر کی مرکزی تقریب رات کے وقت پاکستان مونومنٹ اسلام آباد میں منعقد ہو گی، جس میں تمام مکاتبِ فکر سے اہم شخصیات شرکت کریں گی۔ اس تقریب کے مہمانِ خصوصی وزیراعظم پاکستان ہوں گے، جب کہ چیئرمین جوائنٹ چیفس آف اسٹاف کمیٹی اور تینوں مسلح افواج کے سربراہان بھی تقریب میں شریک ہوں گے۔
