اسلام آباد: وفاقی وزیر داخلہ محسن نقوی سے آسٹریلیا کے ہائی کمشنر نیل ہاکنز نے ملاقات کی، جس میں پاک–آسٹریلیا تعلقات، باہمی تعاون کے فروغ اور مختلف شعبوں میں اشتراکِ عمل پر تفصیلی تبادلہ خیال کیا گیا۔
ملاقات میں کوسٹ گارڈز، بارڈر مینجمنٹ اور انسانی اسمگلنگ کی روک تھام کے لیے تعاون بڑھانے پر بھی بات چیت ہوئی۔
آسٹریلوی ہائی کمشنر نے حالیہ دہشت گرد حملوں میں پولیس افسران اور سیکیورٹی فورسز کے جوانوں کی شہادت پر افسوس کا اظہار کیا اور ان کی قربانیوں کو خراجِ تحسین پیش کیا۔
نیل ہاکنز نے قذافی اسٹیڈیم کی بحالی کے کام کی تعریف کرتے ہوئے کہا کہ محسن نقوی کی قیادت میں اسلام آباد میں نمایاں ترقیاتی اور فلاحی منصوبے قابلِ ستائش ہیں۔ انہوں نے کہا کہ پاکستان میں گزارا وقت یادگار رہا، لاہور کا دربار بی بی پاک دامن ان کی پسندیدہ جگہ ہے، اور حالیہ عرصے میں پاکستان کا بین الاقوامی وقار بڑھا ہے۔
اس موقع پر وزیر داخلہ محسن نقوی نے کہا کہ حکومت غیر قانونی امیگریشن کی حوصلہ شکنی اور قانونی امیگریشن کے فروغ پر یقین رکھتی ہے۔ غیر قانونی انسانی اسمگلنگ میں ملوث افراد کے خلاف سخت کارروائی جاری ہے۔
محسن نقوی نے دو طرفہ تعلقات کے فروغ میں نیل ہاکنز کی خدمات کو سراہا اور ان کے مستقبل کے لیے نیک خواہشات کا اظہار کیا۔
اس ملاقات میں وزیرِ مملکت طلال چوہدری، وفاقی سیکرٹری داخلہ خرم آغا اور آسٹریلوی ہائی کمیشن کے اعلیٰ حکام بھی شریک تھے۔
