میلبرن: آسٹریلیا کی معروف سوئمر اور چار بار کی اولمپک گولڈ میڈلسٹ آریارنے ٹٹمس نے اچانک ریٹائرمنٹ کا اعلان کر کے مداحوں کو حیران کر دیا۔
آسٹریلوی میڈیا کے مطابق 25 سالہ آریارنے ٹٹمس نے سوشل میڈیا پر جاری بیان میں کہا کہ یہ فیصلہ مشکل ضرور ہے مگر میں اس سے مطمئن ہوں۔
انہوں نے کہا کہ “میں نے 18 سال سوئمنگ میں گزارے، جن میں سے 10 سال اپنے ملک کے لیے وقف کیے۔ میں ہمیشہ سوئمنگ سے محبت کرتی رہی ہوں، لیکن ایک وقت ایسا آتا ہے جب زندگی میں سوئمنگ سے آگے بھی بہت کچھ دیکھنا ہوتا ہے۔”
آریارنے ٹٹمس نے انکشاف کیا کہ کینسر کا خوف ان کے لیے زندگی کا ٹرننگ پوائنٹ ثابت ہوا اور اس نے انہیں ذہنی طور پر گہرائی سے متاثر کیا۔
واضح رہے کہ پیرس اولمپکس سے قبل انہیں کینسر کے ٹیومر کی سرجری کرانا پڑی تھی۔
پیرس اولمپکس میں آریارنے ٹٹمس نے 400 میٹر فری اسٹائل ایونٹ میں دو سابقہ ورلڈ ریکارڈ ہولڈرز کو شکست دے کر گولڈ میڈل جیتا تھا۔ وہ 1964 کے بعد پہلی آسٹریلوی سوئمر بنیں جنہوں نے ایک ہی ایونٹ میں بیک ٹو بیک اولمپک گولڈ حاصل کیے۔
آریارنے ٹٹمس نے ٹوکیو اور پیرس اولمپکس میں مجموعی طور پر 8 میڈلز جیتے اور وہ 200 اور 400 میٹر فری اسٹائل کی ورلڈ ریکارڈ ہولڈر بھی ہیں۔
