واشنگٹن: وفاقی وزیر خزانہ محمد اورنگزیب نے واشنگٹن میں سعودی وزیر خزانہ محمد عبداللہ عبدالعزیز الجدعان سے ملاقات کی، جس میں دوطرفہ تجارتی تعلقات، سرمایہ کاری اور اقتصادی تعاون کے مختلف پہلوؤں پر تفصیلی بات چیت ہوئی۔
ملاقات کے دوران دونوں رہنماؤں نے آئی ایف سی (IFC) اور ملٹی لیٹرل انویسٹمنٹ گارنٹی ایجنسی (MIGA) کے کردار پر بھی تبادلہ خیال کیا۔
وزیر خزانہ محمد اورنگزیب نے سعودی ہم منصب کو قومی ایئر لائن (PIA) اور ہوائی اڈوں کی نجکاری سے متعلق پیش رفت سے آگاہ کیا۔ انہوں نے پاکستان میں انفراسٹرکچر منصوبوں کے لیے سعودی تعاون کی خواہش کا بھی اظہار کیا۔
محمد اورنگزیب نے یقین دہانی کرائی کہ پاکستان آئی ایم ایف پروگرام کے تحت اصلاحاتی ایجنڈے پر عمل پیرا ہے اور معیشت کو پائیدار بنیادوں پر مستحکم کرنے کے لیے حکومت سنجیدہ اقدامات کر رہی ہے۔
دونوں وزرائے خزانہ نے اس بات پر اتفاق کیا کہ پاکستان اور سعودی عرب کے تعلقات صرف روایتی دوستی تک محدود نہیں بلکہ یہ اسٹریٹیجک اقتصادی شراکت داری میں تبدیل ہو رہے ہیں، جنہیں آئندہ مزید وسعت دی جائے گی۔
