کراچی: اینٹی نارکوٹکس فورس (اے این ایف) نے اہم کارروائی کرتے ہوئے طلباء کو منشیات فروخت کرنے والے بین الاقوامی سمگلر کو گرفتار کر لیا۔
ترجمان اے این ایف کے مطابق کارروائی اسلام آباد انٹرنیشنل ایئرپورٹ پر کی گئی، جہاں ملزم سے 11.182 کلوگرام ویڈ اور 3.616 کلوگرام کینابس برآمد ہوئی۔ ملزم تھائی لینڈ سے اسلام آباد پہنچا تھا۔
حکام کے مطابق برآمد شدہ منشیات کی مالیت ایک کروڑ چھ لاکھ روپے سے زائد ہے۔ ملزم کا ارادہ تھا کہ یہ منشیات آزاد کشمیر سمگل کی جائیں۔
تحقیقات کے دوران ملزم نے انکشاف کیا کہ وہ ڈھڈیال (آزاد کشمیر) میں اپنے ساتھی طلباء کو منشیات فروخت کرتا تھا۔
ترجمان اے این ایف کے مطابق، گرفتار ملزم کے خلاف انسدادِ منشیات ایکٹ 1997 کے تحت مقدمہ درج کر لیا گیا ہے اور مزید تحقیقات جاری ہیں۔
