مسلم لیگ (ن) کے صدر اور سابق وزیراعظم نواز شریف نے کہا ہے کہ پاکستان ہماری ریڈ لائن ہے اور اس کی طرف کسی کو بھی میلی آنکھ سے دیکھنے کی اجازت نہیں دی جائے گی۔ انہوں نے یہ بات وزیراعظم شہباز شریف سے جاتی امرا میں ہونے والی ملاقات کے دوران کہی۔
ذرائع کے مطابق اتوار کے روز وزیراعظم شہباز شریف، مسلم لیگ (ن) کے صدر نواز شریف سے ملاقات کے لیے ان کی رہائش گاہ جاتی امرا پہنچے۔ ملاقات میں وزیراعلیٰ پنجاب مریم نواز بھی شریک تھیں۔ اس موقع پر ملکی سیاسی صورتحال، قومی سلامتی اور حالیہ پیش رفت پر تفصیلی تبادلہ خیال کیا گیا۔
وزیراعظم نے نواز شریف کو پاکستان اور افغانستان کے درمیان جاری مذاکرات سے متعلق تفصیلات سے آگاہ کیا۔ ملاقات میں دہشت گردی کے مکمل خاتمے اور ملک میں پائیدار امن کے قیام کے عزم کا اعادہ کیا گیا۔
نواز شریف کا کہنا تھا کہ “پاکستان کی طرف کسی کو بھی میلی آنکھ سے دیکھنے نہیں دیں گے، وطن عزیز کی حفاظت کے لیے کسی قربانی سے دریغ نہیں کریں گے۔ قوم کے بیٹے اپنی جانوں کی پرواہ کیے بغیر پاک وطن کا دفاع کررہے ہیں۔”
اس موقع پر وزیراعظم شہباز شریف نے کہا کہ دہشت گردوں کا مکمل صفایا ہی امن کی ضمانت ہے، عوام کی جان و مال کا تحفظ حکومت کی اولین ترجیح ہے۔ انہوں نے کہا کہ ملک میں استحکام اور امن کے لیے تمام ادارے ایک پیج پر ہیں۔
دوسری جانب وزیراعظم شہباز شریف سے وفاقی وزیر داخلہ محسن نقوی نے لاہور میں ملاقات کی۔ ملاقات میں ملک میں امن و امان کی صورتحال اور جاری ترقیاتی منصوبوں پر بریفنگ دی گئی۔
وزیراعظم ہاؤس کے مطابق وزیراعظم کو اسلام آباد میں جاری ترقیاتی منصوبوں کی پیش رفت سے بھی آگاہ کیا گیا۔
