غزہ: اسرائیل نے سیز فائر معاہدے کی سنگین خلاف ورزیوں کے دوران درجنوں فلسطینیوں کو شہید کرنے کے بعد ایک بار پھر جنگ بندی کے نفاذ کا اعلان کر دیا۔
قطری نشریاتی ادارے کے مطابق، جنگ بندی معاہدے کے بعد بھی اسرائیلی جارحیت جاری رہی، جس میں اب تک غزہ میں 98 فلسطینی شہید اور 230 سے زائد زخمی ہو چکے ہیں۔ قابض افواج نے حماس کے نام پر شہری علاقوں پر بمباری کرتے ہوئے غزہ میں 120 سے زائد فضائی حملے کیے، جن میں خان یونس کے بے گھر خیمہ بستیوں اور نصیرات کیمپ کو بھی نشانہ بنایا گیا۔
ذرائع کے مطابق، جنگ بندی کے باوجود اسرائیلی فضائی حملوں میں صرف گزشتہ روز 45 فلسطینیوں نے جامِ شہادت نوش کیا۔ اسرائیلی فوج نے الزام لگایا کہ یہ کارروائیاں حماس کے حملوں کے جواب میں کی گئیں، تاہم حماس نے ان الزامات کو مسترد کرتے ہوئے کہا کہ اسرائیل جنگ دوبارہ شروع کرنے کے بہانے تلاش کر رہا ہے۔
اسرائیلی فوج نے تازہ بیان میں کہا کہ “حماس کے اہداف پر کارروائی کے بعد” اب غزہ میں جنگ بندی دوبارہ نافذ کر دی گئی ہے۔
ادھر حماس رہنما خلیل الحیہ کی قیادت میں ایک اعلیٰ سطحی وفد قاہرہ پہنچ چکا ہے، جو مصری حکام کے ساتھ شرم الشیخ میں طے پانے والے سیز فائر معاہدے پر عمل درآمد کے امور پر بات چیت کرے گا۔
دوسری جانب، امریکی خصوصی ایلچی اسٹیو وٹکوف، صدر ڈونلڈ ٹرمپ کے مشیر جیرڈ کُشنر، اور نائب صدر جے ڈی وینس رواں ہفتے اسرائیل پہنچ رہے ہیں، جہاں وہ وزیراعظم نیتن یاہو اور دیگر اعلیٰ حکام سے ملاقاتیں کریں گے تاکہ جنگ بندی کے امریکی فریم ورک کو آگے بڑھایا جا سکے۔
امریکی صدر ڈونلڈ ٹرمپ نے صحافیوں سے گفتگو میں کہا کہ “جنگ بندی اب بھی برقرار ہے” اور یہ کہ وہ اسرائیلی حملوں کی جوازیت پر کوئی رائے دینے سے پہلے مزید معلومات حاصل کریں گے۔
