اسلام آباد: وزیراعظم شہباز شریف نے ملکی صنعتی پیداوار میں اضافے اور توانائی کے بہتر استعمال کے لیے پاور ڈویژن کو جامع اور مؤثر پالیسی سفارشات تیار کرنے کی ہدایت کر دی۔
وزیراعظم کی زیرِ صدارت پاور ڈویژن کے اصلاحاتی ایجنڈے اور بجلی کی پیداوار سے متعلق جائزہ اجلاس منعقد ہوا، جس میں انہیں ملک میں بجلی کی پیداوار، توانائی کے مؤثر استعمال اور مجوزہ اصلاحاتی پیکج پر تفصیلی بریفنگ دی گئی۔
وزیراعظم شہباز شریف نے پاور ڈویژن کو ہدایت کی کہ بجلی کی پیداوار کے بہترین استعمال سے صنعتی و زرعی پیداوار بڑھانے کے لیے جامع حکمت عملی تیار کی جائے۔ انہوں نے مزید کہا کہ سرمایہ کاروں اور صنعت کاروں کو سہولت فراہم کرنے کے لیے بھی ٹھوس سفارشات مرتب کی جائیں تاکہ معاشی ترقی کے عمل کو تیز کیا جا سکے۔
وزیراعظم نے زور دیا کہ صنعت اور زراعت کے شعبے ملکی معیشت کی ریڑھ کی ہڈی ہیں، ان شعبوں کو توانائی کی فراہمی میں کسی قسم کی رکاوٹ نہیں آنی چاہیے۔ انہوں نے کہا کہ بجلی کے مثبت اور مؤثر استعمال سے صنعتی مصنوعات کے معیار اور زرعی پیداوار میں نمایاں اضافہ ممکن ہے۔
اجلاس میں وفاقی وزیر توانائی سردار اویس خان لغاری، وفاقی وزیر اطلاعات عطاء اللہ تارڑ، وفاقی وزیر اقتصادی امور احد خان چیمہ، مشیر برائے صنعت ہارون اختر اور دیگر اعلیٰ حکام نے شرکت کی۔
