لاہور: معروف اداکارہ ثروت گیلانی نے کہا ہے کہ فلموں اور ویب سیریز میں خواتین کی سگریٹ نوشی کو آزادی یا خودمختاری کی علامت سمجھنا درست نہیں، ایسے مناظر صرف کردار اور کہانی کی ضرورت کے تحت دکھائے جاتے ہیں۔
ایک حالیہ انٹرویو میں ثروت گیلانی نے کہا کہ بعض ناظرین خواتین کے سگریٹ نوشی کے مناظر کو غلط مفہوم میں لیتے ہیں، حالانکہ یہ کسی کردار کی نفسیات یا حالات کی عکاسی کرتے ہیں، نہ کہ آزادی یا طاقت کے اظہار کے لیے شامل کیے جاتے ہیں۔
اداکارہ نے وضاحت کی کہ ہمارے معاشرے میں کچھ خواتین واقعی سگریٹ نوشی کرتی ہیں، لہٰذا اگر کوئی کردار ایسا دکھایا جائے تو وہ حقیقت کے قریب تر ہوتا ہے، لیکن اس عمل کو خواتین کی خودمختاری سے منسلک کرنا غیر مناسب ہے۔
ثروت گیلانی نے مزید کہا کہ ویب سیریز اور ٹی وی ڈراموں کے کام کے انداز میں نمایاں فرق ہے، ڈیجیٹل پلیٹ فارمز پر کام کی رفتار زیادہ تیز ہوتی ہے، جہاں اداکار کو چند لمحوں میں ہی جذباتی شدت پیدا کرنی پڑتی ہے، جب کہ روایتی ڈراموں میں اداکار کے پاس خود کو کردار میں ڈھالنے کے لیے زیادہ وقت ہوتا ہے۔
انہوں نے کہا کہ وہ اپنے کرداروں کے ذریعے خواتین کے حقیقی مسائل اور سماجی رویوں کو اجاگر کرنا چاہتی ہیں تاکہ معاشرے میں مثبت سوچ اور بامقصد تبدیلی کو فروغ دیا جا سکے۔
