رفح: غزہ کے شہر رفح میں حماس اور اسرائیلی فوج کے درمیان جھڑپ کا واقعہ پیش آیا جس میں اسرائیلی فوج کے 2 اہلکار ہلاک اور 3 زخمی ہوگئے۔ دونوں فریق ایک دوسرے کو جنگ بندی کی خلاف ورزی کا ذمہ دار ٹھہرا رہے ہیں۔
عالمی خبر رساں ادارے کے مطابق ہلاک ہونے والے دونوں فوجیوں کی شناخت میجر یانیو کولو (26 سال) اور سٹاف سارجنٹ اِتائے یاویٹس (21 سال) کے نام سے ہوئی ہے، جو نہال بریگیڈ کی 932 ویں بٹالین سے تعلق رکھتے تھے۔ واقعہ اس وقت پیش آیا جب اسرائیلی فوج رفح کے جنوب مشرقی علاقے میں حماس کی سرنگوں اور انفراسٹرکچر کے ملبے کو ہٹانے کا کام کر رہی تھی۔
حماس کے جنگجوؤں نے اچانک ایک سرنگ سے نکل کر اسرائیلی فوج پر راکٹ حملہ کیا، جس میں ایک ایکسکیویٹر کو نشانہ بنایا گیا اور دو اہلکار موقع پر ہلاک ہو گئے۔ اس کے علاوہ سنائپر فائرنگ میں مزید تین فوجی زخمی ہوئے، جن میں سے ایک کی حالت تشویشناک بتائی جا رہی ہے، جس کی وجہ سے ہلاکتوں میں اضافے کا خدشہ ہے۔
اسرائیلی حکام نے اس حملے کو غزہ میں جاری جنگ بندی کی خلاف ورزی قرار دیا ہے، جب کہ حماس نے موقف اختیار کیا ہے کہ یہ علاقہ اسرائیلی کنٹرول میں تھا اور ان کے جنگجو متحرک نہیں تھے۔ مزید برآں، حماس نے دعویٰ کیا ہے کہ اس نے ایک اور اسرائیلی یرغمالی کی لاش دریافت کر لی ہے جسے مناسب وقت پر حوالے کیا جائے گا۔
یاد رہے کہ غزہ میں اب بھی 16 اسرائیلی یرغمالیوں کی لاشیں ملبے تلے دبی ہوئی ہیں، جن کی بازیابی کے لیے آپریشن جاری ہے۔
