اسلام آباد: پاکستان مسلم لیگ (ن) نے آزاد جموں و کشمیر حکومت سے علیحدگی کا باضابطہ اعلان کر دیا۔
مسلم لیگ (ن) آزاد کشمیر کے صدر شاہ غلام قادر نے کہا کہ اگر پیپلز پارٹی تحریک عدم اعتماد لاتی ہے تو یہ ان کا جمہوری حق ہے، تاہم مسلم لیگ (ن) کسی نئی حکومت کا حصہ نہیں بنے گی۔ ان کا کہنا تھا کہ پارٹی کسی بھی غیر فطری حکومت سازی کا حصہ نہیں بنے گی اور اب اپوزیشن میں بیٹھے گی۔
شاہ غلام قادر نے واضح کیا کہ جو بھی پارٹی پالیسی سے انحراف کرے گا، اسے انضباطی کارروائی کا سامنا کرنا پڑے گا۔ انہوں نے کہا کہ نئی حکومت صرف شفاف عام انتخابات کے ذریعے ہی ممکن ہے۔
صدر مسلم لیگ (ن) آزاد کشمیر کا کہنا تھا کہ جماعت مہاجرین اور بیرون ملک کشمیریوں کی فلاح و بہبود کے لیے سرگرم ہے اور ایک منظم و مقبول سیاسی قوت کے طور پر ابھری ہے۔
انہوں نے کہا کہ مسلم لیگ (ن) آئینی اور سیاسی بحران کے حل کے لیے مثبت کردار ادا کرتی رہے گی، جبکہ آزاد کشمیر میں پائیدار اور مضبوط حکومت کا قیام صرف شفاف عام انتخابات سے ممکن ہے۔
شاہ غلام قادر نے مزید کہا کہ مسلم لیگ (ن) نواز شریف اور شہباز شریف کی قیادت میں بھرپور انتخابی مہم چلائے گی۔
