راولپنڈی: فیلڈ مارشل سید عاصم منیر نے کہا ہے کہ بلوچستان پاکستان کا فخر ہے اور صوبے کے عوام باصلاحیت، محب وطن اور باحوصلہ ہیں، جو دراصل ملک کا اصل سرمایہ ہیں۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل نے جنرل ہیڈکوارٹرز (جی ایچ کیو) میں 17ویں نیشنل ورکشاپ بلوچستان کے شرکا سے ملاقات کی۔ اس موقع پر انہوں نے گفتگو کرتے ہوئے کہا کہ وفاقی اور صوبائی حکومتوں کے جاری ترقیاتی منصوبے عوامی فلاح و بہبود اور بلوچستان کے سماجی و معاشی ڈھانچے میں بہتری کے لیے اہم کردار ادا کر رہے ہیں۔
فیلڈ مارشل نے زور دیا کہ بلوچستان کی بے پناہ معاشی صلاحیت کو صوبے کے عوام کی بہتری کے لیے استعمال کیا جائے۔ انہوں نے سول سوسائٹی کے تعمیری کردار کو سراہتے ہوئے کہا کہ نوجوانوں کو بااختیار بنانا اور ان کی رہنمائی کرنا پائیدار ترقی کے لیے ناگزیر ہے۔ ان کا کہنا تھا کہ بلوچستان میں دیرپا خوشحالی کے لیے ضروری ہے کہ سیاسی مفادات سے بالاتر ہو کر قومی مفاد میں کام کیا جائے۔
انہوں نے مزید کہا کہ بھارت کی سرپرستی میں چلنے والی پراکسیز، “فتنہ الہند” اور “فتنہ الخوارج” صوبے میں عوام دشمن اور ترقی مخالف ایجنڈے کو فروغ دے رہی ہیں تاکہ امن و استحکام کو نقصان پہنچایا جا سکے۔
فیلڈ مارشل نے یقین دہانی کرائی کہ پاک فوج اور ریاستی ادارے دہشتگرد عناصر کے مکمل خاتمے کے لیے تمام ضروری اقدامات کر رہے ہیں تاکہ بلوچستان کو اس لعنت سے ہمیشہ کے لیے نجات دلائی جا سکے۔
انہوں نے یہ عزم بھی دہرایا کہ پاکستان خطے میں امن و استحکام کا خواہاں ہے، تاہم ملکی سالمیت کی کسی بھی خلاف ورزی کا بھرپور اور فیصلہ کن جواب دیا جائے گا تاکہ شہریوں کی جان و مال کا تحفظ یقینی بنایا جا سکے۔ ورکشاپ کے اختتام پر سوال و جواب کا سیشن بھی منعقد ہوا۔
