پاکستان سے جنگ نہیں ہونی چاہیے، امریکی صدر نے بھارتی وزیراعظم کو خبردار کر دیا

واشنگٹن: امریکی صدر ڈونلڈ ٹرمپ نے بھارتی وزیراعظم نریندر مودی کو خبردار کرتے ہوئے کہا ہے کہ پاکستان سے جنگ نہیں ہونی چاہیے۔ دیوالی کی تقریب سے خطاب میں صدر ٹرمپ نے بتایا کہ ان کی نریندر مودی سے ٹیلی فون پر تفصیلی گفتگو ہوئی، جس میں تجارت سمیت کئی اہم امور پر بات چیت ہوئی۔ انہوں نے کہا کہ وہ مسائل کو تجارت کے ذریعے حل کر رہے ہیں اور بھارت روس سے مزید تیل نہیں خریدے گا۔ وائٹ ہاؤس میں خطاب کرتے ہوئے ڈونلڈ ٹرمپ نے ایک بار پھر پاک بھارت جنگ کا ذکر کرتے ہوئے دعویٰ کیا کہ انہوں نے پاکستان اور بھارت کے درمیان جنگ رکوائی۔ ان کے مطابق دونوں ممالک ایٹمی طاقتیں ہیں اور اس جنگ میں 7 طیارے گرائے گئے تھے۔ امریکی صدر نے مزید کہا کہ وہ اب تک 8 جنگیں رکوا چکے ہیں، جن میں سے زیادہ تر تنازعات کو تجارت کے ذریعے ختم کیا گیا۔