اسلام آباد: وفاقی وزیر خزانہ محمد اورنگزیب نے کہا ہے کہ پاکستان نے معاشی محاذ پر نمایاں کامیابیاں حاصل کی ہیں اور مہنگائی کی شرح اب سنگل ڈیجٹ میں آچکی ہے۔ چینی میڈیا کو دیے گئے انٹرویو میں انہوں نے بتایا کہ ملک میں معاشی استحکام اور زرمبادلہ کے ذخائر میں نمایاں بہتری آئی ہے۔ ان کے مطابق موجودہ زرمبادلہ کے ذخائر اڑھائی ماہ کی درآمدات کے لیے کافی ہیں جبکہ پاکستان کی معاشی کارکردگی کو عالمی سطح پر بھی سراہا جا رہا ہے۔
محمد اورنگزیب نے کہا کہ تین بڑی بین الاقوامی ریٹنگ ایجنسیوں نے پاکستان کی کریڈٹ ریٹنگ میں بہتری کی ہے۔ گزشتہ مالی سال کے دوران جی ڈی پی میں 3 فیصد اضافہ ہوا، جبکہ رواں سال 4 فیصد سے زائد ترقی کا ہدف رکھا گیا تھا۔ انہوں نے تسلیم کیا کہ حالیہ سیلاب سے ترقی کے کچھ اہداف متاثر ہو سکتے ہیں، تاہم امید ہے کہ رواں مالی سال کے اختتام تک شرح نمو 3.5 فیصد تک پہنچ جائے گی۔
وفاقی وزیر خزانہ نے بتایا کہ سی پیک کے دوسرے مرحلے میں نمایاں پیشرفت ہوئی ہے اور حال ہی میں بیجنگ میں 24 مشترکہ منصوبوں پر دستخط کیے گئے ہیں، جن سے سرمایہ کاری کے نئے مواقع پیدا ہوں گے۔
