اسلام آباد: وفاقی وزیر داخلہ محسن نقوی نے خیبرپختونخوا حکومت کی جانب سے واپس کی جانے والی بلٹ پروف گاڑیاں فوری طور پر بلوچستان بھجوانے کا اعلان کر دیا۔ وزیراعلیٰ بلوچستان سردار سرفراز بگٹی نے سوشل میڈیا پر وفاقی وزیر داخلہ سے درخواست کی تھی کہ خیبرپختونخوا حکومت کی طرف سے واپس کی جانے والی گاڑیاں بلوچستان کو فراہم کی جائیں تاکہ صوبے میں سکیورٹی کے انتظامات بہتر بنائے جا سکیں۔
سردار سرفراز بگٹی کی درخواست پر محسن نقوی نے فوری ردعمل دیتے ہوئے کہا کہ خیبرپختونخوا سے واپس آنے والی بلٹ پروف گاڑیاں اب بلوچستان کے حوالے کی جائیں گی۔ یاد رہے کہ وزیراعلیٰ خیبرپختونخوا سہیل آفریدی نے وفاقی وزیرداخلہ کی جانب سے فراہم کی گئی بلٹ پروف گاڑیاں واپس کرنے کی ہدایت دی تھی۔
سہیل آفریدی کا کہنا تھا کہ وفاق کی طرف سے دی گئی گاڑیاں ناقص اور پرانی ہیں، جو خیبرپختونخوا پولیس کی تضحیک کے مترادف ہے، اس لیے انہیں واپس کیا جا رہا ہے۔ انہوں نے مزید کہا کہ سابق وزرائے اعلیٰ سے لی گئی سکیورٹی واپس کر کے ان کے تحفظ کو یقینی بنایا جائے گا۔ وزیراعلیٰ نے واضح کیا کہ امن و امان ان کی حکومت کی اولین ترجیح ہے اور اس پر کسی صورت سمجھوتہ نہیں کیا جائے گا۔
