راولپنڈی: بلوچستان کے علاقے دالبندین میں سکیورٹی فورسز نے فتنہ الہندوستان کے خلاف ایک کامیاب کارروائی کرتے ہوئے 6 دہشت گردوں کو ہلاک کر دیا۔ سکیورٹی ذرائع کے مطابق فورسز نے خفیہ معلومات کی بنیاد پر آپریشن کیا جس کے دوران دہشت گردوں کے ٹھکانے کو مؤثر طریقے سے نشانہ بنایا گیا۔
ذرائع کا کہنا ہے کہ دہشت گرد پہاڑی غار میں پناہ لیے ہوئے تھے اور ان پر فضائی نگرانی کے ذریعے مسلسل نظر رکھی جا رہی تھی۔ موقع مناسب ہونے پر فورسز نے کارروائی کرتے ہوئے تمام 6 دہشت گردوں کو جہنم واصل کر دیا۔
سکیورٹی ذرائع نے بتایا کہ یہ کارروائی سکیورٹی فورسز اور خفیہ اداروں کے درمیان بہترین ہم آہنگی اور رابطے کا نتیجہ ہے۔ انہوں نے کہا کہ صوبے میں دہشت گردی کے مکمل خاتمے اور امن و امان کے قیام کے لیے ایسے آپریشنز جاری رہیں گے۔
