راولپنڈی: جنوبی افریقا نے راولپنڈی ٹیسٹ کے چوتھے روز پاکستان کو شکست دے کر دو ٹیسٹ میچوں کی سیریز 1-1 سے برابر کر دی۔
پنڈی کرکٹ اسٹیڈیم میں کھیلے گئے میچ کے چوتھے روز قومی ٹیم کے بیٹرز آغاز سے ہی دباؤ کا شکار رہے اور ایک کے بعد ایک وکٹیں گنواتے گئے، پوری ٹیم 138 رنز پر پویلین لوٹ گئی۔ کپتان بابراعظم نے 50، محمد رضوان نے 18، سعود شکیل نے 11، امام الحق نے 9 اور عبداللہ شفیق نے 6 رنز بنائے، جبکہ شان مسعود، نعمان علی اور شاہین آفریدی بغیر کوئی رن بنائے آؤٹ ہوئے۔ جنوبی افریقی اسپنر سیمون ہارمر نے شاندار بولنگ کرتے ہوئے 6 کھلاڑیوں کو آؤٹ کیا۔
جوابی اننگز میں مہمان ٹیم نے 68 رنز کا آسان ہدف بغیر کسی مشکل کے حاصل کرتے ہوئے میچ اپنے نام کرلیا۔ پنڈی کی پچ اسپنرز کے لیے سازگار ثابت ہوئی، جس کا جنوبی افریقی اسپن اٹیک نے بھرپور فائدہ اٹھایا۔ پروٹیز اسپنرز نے پورے میچ میں مجموعی طور پر 17 وکٹیں حاصل کر کے اپنی کامیابی میں کلیدی کردار ادا کیا۔
یاد رہے کہ پاکستان نے پہلی اننگز میں 333 رنز بنائے تھے، جس کے جواب میں جنوبی افریقا نے 404 رنز اسکور کیے اور 71 رنز کی برتری حاصل کی، جو میچ کے نتیجے میں فیصلہ کن ثابت ہوئی۔
