آزاد کشمیر میں سیاسی منظرنامہ ایک بار پھر تبدیل ہونے والا ہے۔ ذرائع کے مطابق پیپلز پارٹی نے اِن ہاؤس تبدیلی کے لیے مکمل ہوم ورک کرلیا ہے اور قانون ساز اسمبلی میں عددی برتری حاصل کرنے کے قریب پہنچ گئی ہے۔ پارٹی کے تمام ارکان مظفرآباد میں موجود ہیں اور وزیراعظم چوہدری انوارالحق کے خلاف تحریکِ عدم اعتماد تیار کرلی گئی ہے۔
ذرائع کا کہنا ہے کہ مسلم لیگ ن نے بھی پیپلز پارٹی کی تحریکِ عدم اعتماد کی حمایت کا فیصلہ کرلیا ہے، تاہم ن لیگ حکومت کا حصہ نہیں بنے گی۔ بتایا جا رہا ہے کہ ن لیگ کے وفد نے آصف علی زرداری سے ملاقات کے بعد اس عمل کے لیے گرین سگنل دے دیا۔ وفاقی وزیر رانا ثنا اللہ نے بھی تصدیق کی ہے کہ ن لیگ صرف تحریک کی حمایت کرے گی مگر حکومت میں شامل نہیں ہوگی۔
پیپلز پارٹی کے سینئر رہنما قمر زمان کائرہ نے کہا ہے کہ اس اقدام کا مقصد سیاسی استحکام اور جمہوری عمل کو مضبوط بنانا ہے۔ ان کے مطابق یہ تبدیلی کسی ذاتی مفاد کے لیے نہیں بلکہ نظام کو بہتر بنانے کے لیے ضروری ہے۔
اعداد و شمار کے مطابق، قانون ساز اسمبلی میں پیپلز پارٹی کے 17 ارکان، مسلم لیگ ن کے 9 ارکان، تحریک انصاف کے 4 ارکان، جبکہ مسلم کانفرنس اور جموں و کشمیر پیپلز پارٹی کے پاس ایک ایک نشست ہے۔ ن لیگ کی حمایت سے پیپلز پارٹی کے ووٹ 26 تک پہنچ جائیں گے، جس کے بعد اسے واضح برتری حاصل ہوگی۔
سیاسی ذرائع کا کہنا ہے کہ تحریک عدم اعتماد کے لیے مطلوبہ دستخط حاصل کر لیے گئے ہیں اور یہ تحریک کسی بھی وقت اسمبلی میں پیش کی جا سکتی ہے۔ ذرائع نے دعویٰ کیا ہے کہ پیپلز پارٹی نے نئے وزیراعظم کے نام پر بھی اتفاق کرلیا ہے، جس کا اعلان چیئرمین بلاول بھٹو زرداری آج متوقع طور پر کریں گے۔
