کراچی: شہرِ قائد میں ٹریفک قوانین کی خلاف ورزیوں کے خلاف متعارف کرایا گیا ای چالان نظام تیزی سے فعال ہو گیا ہے۔ محض چار دنوں کے دوران ٹریفک پولیس نے 18 ہزار 733 الیکٹرانک چالان جاری کیے، جن کی مجموعی مالیت 10 کروڑ روپے سے تجاوز کر گئی۔
ٹریفک پولیس کے مطابق، گزشتہ 24 گھنٹوں میں 5 ہزار 791 چالان کیے گئے۔ سب سے زیادہ خلاف ورزیاں سیٹ بیلٹ نہ پہننے کی تھیں، جن کی تعداد 3 ہزار 546 رہی، جب کہ ہیلمیٹ نہ پہننے پر 1 ہزار 555 موٹر سائیکل سواروں کو جرمانہ کیا گیا۔
ای چالان سسٹم کے تحت شہر کے مختلف مقامات پر جدید ہائی ٹیک کیمرے نصب کیے گئے ہیں جو خودکار طور پر گاڑیوں کی نمبر پلیٹ اسکین کر کے قانون کی خلاف ورزی کی نشاندہی کرتے ہیں۔ چالان کی تفصیل متعلقہ شہریوں کو ایس ایم ایس یا گھر کے پتے پر بھی بھیجی جاتی ہے۔
پولیس حکام کا کہنا ہے کہ اس نظام کے نفاذ سے نہ صرف رشوت ستانی اور موقع پر بحث و تکرار کے واقعات میں کمی آئی ہے بلکہ شہریوں کے رویے میں بھی تبدیلی دیکھنے میں آئی ہے۔
دلچسپ بات یہ ہے کہ سرکاری گاڑیاں بھی ای چالان سسٹم سے مستثنیٰ نہیں۔ رپورٹ کے مطابق، گزشتہ چار دنوں میں 35 سرکاری گاڑیوں پر بھی چالان جاری کیے گئے، جن کی مجموعی رقم تقریباً 4 لاکھ روپے بنتی ہے۔
ڈی آئی جی ٹریفک پیر محمد شاہ نے کہا کہ ای چالان نظام کا مقصد شہریوں پر دباؤ ڈالنا نہیں بلکہ محفوظ ڈرائیونگ کا کلچر فروغ دینا ہے۔ ان کے مطابق، اگر شہری ٹریفک قوانین کی پابندی کریں تو حادثات میں نمایاں کمی ممکن ہے۔
ان کا کہنا تھا، “ہم چاہتے ہیں کہ کراچی کی سڑکیں محفوظ ہوں، ہر ڈرائیور قانون کے مطابق سفر کرے، اور شہر میں نظم و ضبط قائم ہو۔”
شہریوں کی جانب سے ای چالان نظام پر ملے جلے ردعمل سامنے آئے ہیں۔ کچھ نے اسے نظم و ضبط کے قیام کے لیے خوش آئند قرار دیا، جب کہ بعض نے شکایت کی کہ انہیں غلط نمبروں پر چالان موصول ہوئے۔
شہریوں نے حکومت سے مطالبہ کیا ہے کہ چالان کی رقم دیگر صوبوں کے برابر رکھی جائے اور شہر کا انفرا اسٹرکچر بہتر بنایا جائے تاکہ ٹریفک کی روانی میں آسانی ہو اور قوانین کی خلاف ورزی کے امکانات کم ہوں۔
