اسلام آباد: وزارتِ اطلاعات و نشریات پاکستان نے بھارتی میڈیا کے جھوٹے پراپیگنڈے کی سختی سے تردید کرتے ہوئے واضح کیا ہے کہ پاکستان نے اسرائیل کو کبھی تسلیم نہیں کیا اور نہ ہی اس کے ساتھ کسی قسم کے فوجی تعاون پر غور ہو رہا ہے۔
بھارتی چینل ریپبلک ٹی وی نے ایک بے بنیاد رپورٹ میں دعویٰ کیا کہ پاکستان مبینہ طور پر مغربی ممالک اور اسرائیل کی نگرانی میں 20 ہزار فوجی غزہ بھیجنے کی تیاری کر رہا ہے۔ رپورٹ میں یہ مضحکہ خیز الزام بھی عائد کیا گیا کہ پاکستان نے اپنے پاسپورٹ سے ’’اسرائیل کے لیے ناقابلِ استعمال‘‘ کی شق ختم کر دی ہے۔
وزارتِ خارجہ پاکستان کی جانب سے جاری بیان میں ان تمام دعوؤں کو من گھڑت اور بے بنیاد قرار دیتے ہوئے کہا گیا کہ پاکستانی پاسپورٹ پر اب بھی واضح طور پر درج ہے کہ:
“یہ پاسپورٹ اسرائیل کے علاوہ تمام ممالک کے لیے قابلِ استعمال ہے۔”
ڈائریکٹوریٹ جنرل آف امیگریشن اینڈ پاسپورٹس کے مطابق اس شق میں کسی قسم کی تبدیلی یا ترمیم نہیں کی گئی۔
وزارتِ اطلاعات و نشریات نے بھارتی میڈیا کے پروپیگنڈے کو سختی سے مسترد کرتے ہوئے کہا کہ پاکستان کا مؤقف ہمیشہ سے واضح، دو ٹوک اور اصولی رہا ہے —
“پاکستان نے نہ کبھی اسرائیل کو تسلیم کیا ہے اور نہ ہی اس کے ساتھ کسی فوجی یا سفارتی تعاون پر غور کیا جا رہا ہے۔”
مزید کہا گیا کہ پاکستان فلسطینی عوام کے حقِ خود ارادیت اور ان کے جائز مؤقف کی بھرپور حمایت کرتا ہے، جبکہ جھوٹے اور زہریلے بیانیے گھڑ کر پاکستان کے خلاف پروپیگنڈا کرنا بھارتی گودی میڈیا کی پرانی عادت ہے۔
پاکستانی حکام کے مطابق، اس طرح کی جھوٹی خبریں خطے میں انتشار پھیلانے کی کوشش ہیں، جنہیں عوام اور عالمی برادری کو حقائق کی روشنی میں مسترد کرنا چاہیے۔
