اسلام آباد: حکومتِ پاکستان نے پیٹرولیم مصنوعات کی قیمتوں میں ردوبدل کرتے ہوئے عوام پر جزوی بوجھ ڈال دیا ہے۔ وزارتِ خزانہ کی جانب سے جاری نئے نوٹیفکیشن کے مطابق پیٹرول اور ہائی اسپیڈ ڈیزل کی قیمتوں میں اضافہ کیا گیا ہے، جبکہ ایل پی جی کی قیمت میں کمی کی گئی ہے۔
تفصیلات کے مطابق پیٹرول کی قیمت میں 2 روپے 43 پیسے فی لیٹر اضافہ کیا گیا ہے، جس کے بعد پیٹرول کی نئی قیمت 265 روپے 45 پیسے فی لیٹر مقرر کی گئی ہے۔ اسی طرح ہائی اسپیڈ ڈیزل کی قیمت میں 3 روپے 2 پیسے فی لیٹر اضافہ کے بعد نئی قیمت 278 روپے 44 پیسے فی لیٹر ہو گئی ہے۔
دوسری جانب عوام کو کچھ ریلیف ایل پی جی کی قیمت میں کمی کی صورت میں ملا ہے۔ اوگرا کی جانب سے جاری اعلامیے کے مطابق ایل پی جی کی فی کلو قیمت میں 5 روپے 89 پیسے کمی کی گئی ہے، جس کے بعد نئی قیمت 201 روپے 60 پیسے فی کلو مقرر کر دی گئی ہے۔
اسی طرح 11.8 کلوگرام کے گھریلو ایل پی جی سلنڈر کی قیمت میں 69 روپے 44 پیسے کمی کے بعد نئی قیمت 2 ہزار 378 روپے 89 پیسے ہو گئی ہے۔ حکومت کی جانب سے جاری کردہ اعلامیے کے مطابق نئی قیمتوں کا اطلاق آج سے کر دیا گیا ہے۔
