پشاور: وزیراعلیٰ خیبر پختونخوا محمد سہیل آفریدی کی ہدایت پر ایڈمنسٹریشن ڈیپارٹمنٹ نے صوبائی کابینہ کے محکموں کے حوالے سے باضابطہ اعلامیہ جاری کر دیا ہے۔ اعلامیے کے مطابق کابینہ کے ممبران کو ان کے متعلقہ محکموں کی ذمہ داریاں سونپ دی گئی ہیں۔
اعلامیے میں بتایا گیا ہے کہ مینا خان آفریدی صوبائی وزیر برائے بلدیات، الیکشن اور دیہی ترقی جبکہ ارشد ایوب خان وزیر برائے ابتدائی و ثانوی تعلیم ہوں گے۔ فضل شکور خان کو وزیر برائے پبلک ہیلتھ انجینئرنگ مقرر کیا گیا ہے اور ڈاکٹر امجد علی وزیر برائے ہاؤسنگ کے فرائض سنبھالیں گے۔ آفتاب عالم وزیر برائے قانون، پارلیمانی امور اور انسانی حقوق کے امور انجام دیں گے۔
مزید برآں، سید فخر جہان وزیر برائے ایکسائز، ٹیکسیشن اور نارکوٹکس کنٹرول، ریاض خان وزیر برائے آبپاشی، خلیق الرحمان وزیر برائے صحت، اور عاقب اللہ خان وزیر برائے ریلیف، بحالی اور آبادکاری مقرر کیے گئے ہیں۔ فیصل خان ترکئی وزیر برائے محنت (لیبر) کے عہدے پر فائز ہوں گے۔ مزمل اسلم مشیر خزانہ جبکہ تاج محمد ترند مشیر برائے کھیل و امورِ نوجوانان ہوں گے۔ شفیع اللہ جان معاون خصوصی برائے اطلاعات کے فرائض انجام دیں گے۔
اعلامیے کے مطابق کابینہ میں یہ تبدیلیاں وزیراعلیٰ کے وژن کے مطابق صوبے کے ترقیاتی اور انتظامی امور کو مزید موثر بنانے کے لیے کی گئی ہیں۔
