پشاور: محکمہ انسداد دہشت گردی (سی ٹی ڈی) کے تھانے میں شارٹ سرکٹ کے باعث دھماکے کا افسوسناک واقعہ پیش آیا، جس کے نتیجے میں ایک سی ٹی ڈی اہلکار شہید جبکہ دو اہلکار زخمی ہو گئے۔
پولیس کے مطابق دھماکے سے تھانے کی عمارت کا ایک حصہ منہدم ہوا اور بارودی مواد میں آگ لگنے سے نقصان ہوا۔ ابتدائی تحقیقات میں واضح کیا گیا ہے کہ یہ واقعہ کسی حملے کا نتیجہ نہیں بلکہ شارٹ سرکٹ کے باعث پیش آیا۔
کیپیٹل سٹی پولیس آفیسر (سی سی پی او) پشاور ڈاکٹر سعید کے مطابق تھانے میں تین اہلکار موجود تھے جن میں سے ایک اہلکار بلال خان موقع پر شہید ہوگئے جبکہ دو زخمیوں کو اسپتال منتقل کر دیا گیا ہے۔ سی سی پی او نے مزید بتایا کہ تھانے میں موجود چار زیر حراست ملزمان کو بروقت محفوظ مقام پر منتقل کر دیا گیا۔
دھماکے کے بعد ایس ایس پی آپریشنز کی سربراہی میں علاقے کو سیل کر کے پولیس کی بھاری نفری تعینات کر دی گئی۔ آئی جی خیبرپختونخوا نے واقعے کا نوٹس لیتے ہوئے ایڈیشنل آئی جی سی ٹی ڈی سے پانچ روز میں تفصیلی رپورٹ طلب کر لی ہے۔
شہید اہلکار بلال خان کی نمازِ جنازہ ملک سعد شہید پولیس لائنز میں سرکاری اعزاز کے ساتھ ادا کی گئی، جس میں گورنر خیبرپختونخوا فیصل کریم کنڈی، آئی جی پولیس ذوالفقار حمید، سی سی پی او پشاور، عسکری حکام اور شہید کے اہل خانہ نے شرکت کی۔ پولیس کے چاق و چوبند دستے نے شہید کو سلامی پیش کی۔
