اسلام آباد: وفاقی حکومت نے 27ویں آئینی ترمیم کے حوالے سے سیاسی مشاورت کا دائرہ مزید وسیع کرنے کا فیصلہ کر لیا ہے۔ ذرائع کے مطابق وزیراعظم شہباز شریف نے اتحادی جماعتوں سے باضابطہ رابطوں کی ہدایت جاری کر دی ہے تاکہ مجوزہ آئینی ترمیم پر وسیع تر اتفاقِ رائے پیدا کیا جا سکے۔
ابتدائی طور پر پیپلز پارٹی کے ساتھ بات چیت کے بعد اب حکومت ایم کیو ایم پاکستان، مسلم لیگ (ق)، آئی پی پی، اے این پی اور جے یو آئی (ف) سمیت دیگر اتحادی جماعتوں سے بھی مشاورت کرے گی۔ حکومتی ذرائع کے مطابق 27ویں آئینی ترمیم کے خدوخال تیار کر لیے گئے ہیں، جن میں آرٹیکل 243 میں تبدیلی، تعلیمی امور کو دوبارہ وفاق کے دائرہ اختیار میں لانے، آئینی عدالت کے قیام، این ایف سی ایوارڈ اور الیکشن کمیشن سے متعلق شقوں میں ترمیم شامل ہیں۔
ذرائع کا کہنا ہے کہ حکومت تمام اسٹیک ہولڈرز کو اعتماد میں لے کر ترمیمی پیکیج کو حتمی شکل دینے کی خواہاں ہے۔ سیاسی مبصرین کے مطابق آئندہ دنوں میں حکومتی رابطوں اور بیانات میں مزید تیزی دیکھنے میں آئے گی۔
دوسری جانب اسپیکر قومی اسمبلی سردار ایاز صادق نے پارلیمانی رہنماؤں کا اجلاس بدھ کی شام 4 بجے پارلیمنٹ ہاؤس میں طلب کر لیا ہے، جس میں قومی اسمبلی کے آئندہ اجلاس اور اہم قومی امور پر مشاورت کی جائے گی۔
