نیویارک — امریکی تاریخ میں ایک نیا باب رقم ہو گیا ہے، جہاں 34 سالہ ظہران ممدانی شہر کے پہلے مسلمان میئر منتخب ہو گئے ہیں۔ یہ کامیابی نہ صرف ان کی ذاتی جدوجہد کا ثمر ہے بلکہ امریکا میں ترقی پسند سیاست کے لیے بھی ایک بڑی پیش رفت قرار دی جا رہی ہے۔
ڈیموکریٹک سوشلسٹ ظہران ممدانی نے سابق گورنر اینڈریو کومو کو آزاد امیدوار کی حیثیت سے شکست دے کر سب کو حیران کر دیا۔ ممدانی نے اپنی جرات مندانہ مہم، عوام دوست پالیسیوں اور عام شہریوں کے مسائل پر مبنی ایجنڈے کے ذریعے ووٹروں کے دل جیت لیے۔
مہم کے دوران ممدانی نے وعدہ کیا تھا کہ وہ کرایوں میں اضافے کو روکنے، شہر میں بسوں کا کرایہ ختم کرنے اور عام شہریوں کے لیے زندگی کو آسان بنانے کے لیے عملی اقدامات کریں گے۔
نیویارک الیکشن بورڈ کے مطابق، ممدانی کے حق میں دو ملین سے زائد ووٹ کاسٹ ہوئے، جو 1969 کے بعد سب سے زیادہ ٹرن آؤٹ ہے۔
دوسری جانب، ورجینیا میں ڈیموکریٹ امیدوار ایبیگیل اسپینبرگر ریاست کی پہلی خاتون گورنر منتخب ہو گئی ہیں جبکہ نیو جرسی میں میکی شیریل نے گورنر کا انتخاب جیت لیا۔ ان تینوں ریاستوں کے نتائج کو ڈیموکریٹک پارٹی کے لیے ایک بڑی سیاسی کامیابی قرار دیا جا رہا ہے۔
سیاسی مبصرین کا کہنا ہے کہ ان انتخابات نے واضح کیا ہے کہ امریکی عوام اب معیشت، روزگار اور مہنگائی جیسے بنیادی مسائل پر زیادہ توجہ دے رہے ہیں۔ ظہران ممدانی کی جیت نے نئی نسل میں امید اور ترقی پسند سیاست کا نیا جذبہ پیدا کر دیا ہے۔
