تہران — ایران نے انسانی ہمدردی کی بنیاد پر دو فرانسیسی شہریوں کو رہا کر دیا ہے جو گزشتہ تین برس سے جاسوسی کے الزام میں قید تھے۔ فرانسیسی صدر ایمانویل میکرون نے دونوں شہریوں کی رہائی کی تصدیق کرتے ہوئے کہا ہے کہ یہ جوڑا فی الحال تہران میں فرانسیسی سفارتخانے میں موجود ہے۔
خبر رساں ادارے رائٹرز کے مطابق ایرانی وزیر خارجہ عباس عراقچی نے بدھ کے روز سرکاری میڈیا سے گفتگو کرتے ہوئے بتایا کہ فرانسیسی شہریوں کی رہائی اسلامی اصولوں اور انسانی ہمدردی کے تحت عمل میں لائی گئی ہے۔ انہوں نے کہا کہ دونوں شہری تاحال ایران ہی میں موجود ہیں اور ان کی وطن واپسی کے انتظامات جاری ہیں۔
فرانسیسی صدر میکرون نے ایک روز قبل اعلان کیا تھا کہ ایران نے سیسل کوہلر اور ان کے ساتھی ژاک پاریس کو رہا کر دیا ہے۔ یہ دونوں تقریباً تین سال قبل ایران میں جاسوسی کے الزامات کے تحت گرفتار کیے گئے تھے۔
دوسری جانب وزیر خارجہ عراقچی نے مزید بتایا کہ ایک ایرانی خاتون، جسے رواں سال کے آغاز میں فرانس نے رہا کیا تھا، اس وقت فرانس میں ایرانی سفارتخانے میں موجود ہے۔
تجزیہ کاروں کے مطابق یہ اقدام ایران اور فرانس کے درمیان سفارتی تعلقات میں بہتری کی ایک مثبت علامت ہے۔ تاہم ایرانی حکام کا کہنا ہے کہ یہ رہائی کسی عدالتی فیصلے کے نتیجے میں نہیں بلکہ مذہبی و اخلاقی بنیادوں پر ایک “اسلامی رعایت” کے طور پر دی گئی ہے۔
