واشنگٹن: امریکی صدر ڈونلڈ ٹرمپ نے دعویٰ کیا ہے کہ بھارتی وزیراعظم نریندر مودی نے روس سے بڑے پیمانے پر تیل خریدنا بند کردیا ہے۔
وائٹ ہاؤس میں صحافیوں سے گفتگو کے دوران صدر ٹرمپ کا کہنا تھا کہ بھارت کے ساتھ اچھی بات چیت جاری ہے۔ اُنہوں نے کہا کہ وزیراعظم مودی میرے قریبی دوست ہیں اور وہ چاہتے ہیں کہ میں بھارت آؤں، ممکن ہے کہ آئندہ سال بھارت کا دورہ کروں۔
صدر ٹرمپ کے مطابق بھارت نے روس سے تیل کی خریداری روکنے کے حوالے سے مثبت قدم اٹھایا ہے، تاہم انہوں نے اس فیصلے کی مزید تفصیلات نہیں بتائیں۔
واضح رہے کہ اس سے قبل بھی ڈونلڈ ٹرمپ بھارت کی جانب سے روسی تیل نہ خریدنے سے متعلق دعویٰ کرچکے ہیں، لیکن بھارت اور روس دونوں ممالک نے اس بیان کی تردید کی تھی۔
