اسلام آباد: سپریم کورٹ میں مجوزہ 27ویں آئینی ترمیم کے خلاف آئینی درخواست دائر کر دی گئی ہے۔
درخواست سینئر وکیل بیرسٹر علی طاہر کی جانب سے دائر کی گئی ہے، جس میں مؤقف اختیار کیا گیا ہے کہ آرٹیکل 143 اور 199 کے تحت عدالتی جائزے کے اختیارات آئین کا بنیادی ستون ہیں۔ درخواست میں کہا گیا کہ عدالتی جائزے کے اختیارات کو ختم، معطل یا متوازی نظام سے تبدیل نہیں کیا جا سکتا۔
درخواست کا مقصد 27 ویں ترمیم سے قبل اعلیٰ عدالتوں کے دائرہ اختیار کو محفوظ بنانا بتایا گیا ہے۔ درخواست میں استدعا کی گئی ہے کہ اگر ترمیم منظور ہو گئی تو سپریم کورٹ اور ہائی کورٹس آئینی معاملات نہیں سن سکیں گی، جس کے نتیجے میں عدالتی نظام مفلوج اور عدالتیں غیر موثر ہو جائیں گی۔
درخواست گزار نے سپریم کورٹ سے درخواست کی ہے کہ وہ اپنے اور ہائی کورٹس کے دائرہ اختیار کا تحفظ کرے۔ درخواست میں کہا گیا کہ ترمیم کے دیگر حصے بعد میں جائزے کے لیے رہ سکتے ہیں مگر عدالتی خودمختاری متاثر نہیں ہونی چاہیے۔
مزید برآں، درخواست میں بین الاقوامی عدالتی مثالیں بھی شامل کی گئی ہیں تاکہ عدالتی اختیار کے تحفظ کی اہمیت واضح کی جا سکے۔ درخواست گزار نے مؤقف اپنایا کہ عدالتی اختیار کا تحفظ عالمی جمہوری اصولوں میں شامل ہے۔
