باکو: ترک صدر رجب طیب اردوان نے اعلان کیا ہے کہ ترکی کے وزیرِ خارجہ حکان فیدان، وزیرِ دفاع یشار گولر اور انٹیلی جنس چیف ابراہیم کالن اگلے ہفتے اسلام آباد کا دورہ کریں گے تاکہ پاکستان اور افغانستان کے درمیان بڑھتی ہوئی کشیدگی پر بات چیت کی جا سکے۔
صدر اردوان نے یہ اعلان آذربائیجان سے واپسی پر صحافیوں سے گفتگو کے دوران کیا۔ انہوں نے کہا کہ افغان طالبان وفد بغیر کسی واضح منصوبے کے مذاکرات میں شریک ہوا اور تحریری معاہدے پر دستخط کرنے سے گریز کیا۔
ذرائع کے مطابق، استنبول میں ہونے والے پاکستان اور افغانستان کے مذاکرات کسی معاہدے کے بغیر ختم ہوگئے۔ دونوں فریقین سرحد پار دہشت گردی کی نگرانی کے طریقہ کار پر اتفاق نہ کر سکے۔
پاکستانی وزیرِ دفاع خواجہ آصف نے تصدیق کی کہ بات چیت ختم ہوچکی ہے اور اب یہ غیر معینہ مدت کے لیے معطل کر دی گئی ہے۔
اطلاعات کے مطابق مذاکرات کے دوران ترکی اور قطر کے ثالثین نے دونوں وفود کے درمیان رابطے کی کوشش کی، تاہم جمعے کے روز براہِ راست ملاقات نہیں ہوئی۔ پاکستانی وفد کی قیادت آئی ایس آئی کے سربراہ لیفٹیننٹ جنرل عاصم ملک نے کی جبکہ افغان وفد کی سربراہی جی ڈی آئی (GDI) کے سربراہ عبدالحق واثق کر رہے تھے۔
پاکستانی وزارتِ خارجہ کے ترجمان طاہر حسین اندرابی نے بتایا کہ پاکستانی وفد نے اپنا مؤقف ٹھوس شواہد اور دلائل کے ساتھ پیش کیا اور ثالثوں کے ذریعے افغان نمائندوں تک اپنے مطالبات پہنچائے۔
ذرائع کے مطابق، اگرچہ مذاکرات میں پیش رفت نہیں ہوئی، تاہم پاکستان اور افغانستان کے درمیان عارضی جنگ بندی بدستور قائم ہے۔
