راولپنڈی: سعودی عرب نے چیئرمین جوائنٹ چیفس آف اسٹاف کمیٹی جنرل ساحر شمشاد مرزا کو ان کی شاندار خدمات کے اعتراف میں ’کنگ عبدالعزیز میڈل آف آنر آف دی ایکسیلینٹ کلاس‘ سے نوازا ہے۔
پاک فوج کے شعبہ تعلقات عامہ (آئی ایس پی آر) کے مطابق جنرل ساحر شمشاد مرزا نے سعودی عرب کے سرکاری دورے کے دوران سعودی مسلح افواج کے چیف آف جنرل اسٹاف جنرل فیاض بن حامد الرویلی سے ملاقات کی۔
ترجمان کے مطابق ملاقات میں عالمی اور خطے کی سیکیورٹی صورتحال سمیت دوطرفہ دفاعی تعاون کو مزید مضبوط بنانے کے امور پر تبادلہ خیال کیا گیا۔ دونوں ممالک کی عسکری قیادت نے پاکستان اور سعودی عرب کے درمیان دیرینہ دفاعی شراکت داری اور بھائی چارے کو مزید گہرا کرنے کے عزم کا اعادہ کیا۔
آئی ایس پی آر کے مطابق، ملاقات کے موقع پر پاکستان اور سعودی عرب کے درمیان فوجی سطح کے تعلقات کو مضبوط بنانے میں نمایاں کردار ادا کرنے پر جنرل ساحر شمشاد مرزا کو ’کنگ عبدالعزیز میڈل آف آنر آف دی ایکسیلینٹ کلاس‘ سے نوازا گیا۔
دوسری جانب، سعودی فوجی قیادت نے پاکستان آرمی کی پیشہ ورانہ مہارتوں کو سراہا اور دہشتگردی کے خلاف جنگ میں دی گئی قربانیوں کا اعتراف کیا۔
