اسلام آباد: صدرِ مملکت آصف علی زرداری سے وزیراعظم محمد شہباز شریف نے ایوانِ صدر میں ملاقات کی، جس میں ملک کی مجموعی سیاسی اور سیکیورٹی صورتحال پر تفصیلی تبادلہ خیال کیا گیا۔
ملاقات میں دونوں قائدین نے دہشت گردی کے حالیہ واقعات کی شدید مذمت کی اور اس عزم کا اظہار کیا کہ غیر ملکی پشت پناہی یافتہ دہشت گردوں اور اُن کے سہولت کاروں کے خلاف کارروائیاں ملک سے دہشت گردی کے مکمل خاتمے تک جاری رہیں گی۔
اس موقع پر چیئرمین سینیٹ سید یوسف رضا گیلانی، اسپیکر قومی اسمبلی سردار ایاز صادق، وفاقی وزراء سید محسن رضا نقوی، چوہدری سالک حسین، اعظم نذیر تارڑ، خالد حسین مگسی اور عبدالعلیم خان بھی موجود تھے۔
بعد ازاں ایوانِ صدر میں عشائیہ کا اہتمام کیا گیا، جس میں بلاول بھٹو زرداری اور ڈپٹی وزیراعظم اسحاق ڈار نے بھی شرکت کی۔ وزیراعظم شہباز شریف عشائیہ میں شرکت کے بعد ایوانِ صدر سے روانہ ہوگئے۔
ذرائع کے مطابق عشائیہ میں شریک ایم کیو ایم وفد اور وفاقی وزراء بھی ملاقات کے بعد واپس روانہ ہوگئے۔
