اسلام آباد: قومی اسمبلی نے 27ویں آئینی ترمیم کے بعد پاکستان آرمی ایکٹ 2025 کی منظوری دے دی۔ نئے قانون کے تحت آرمی چیف کے لیے بطور چیف آف ڈیفنس فورسز نیا نوٹیفکیشن جاری کیا جائے گا۔
مجوزہ آرمی ایکٹ کے مطابق نئے نوٹیفکیشن کے بعد آرمی چیف کی مدتِ ملازمت دوبارہ سے شروع ہوگی، جبکہ چیف آف ڈیفنس فورسز کے طور پر وہ پاک فوج کے تمام شعبوں کی ری اسٹرکچرنگ اور انضمام کی نگرانی کریں گے۔
وزیر قانون اعظم نذیر تارڑ نے ایوان میں بل پیش کرتے ہوئے کہا کہ آرمی چیف اب چیف آف ڈیفنس فورسز بھی ہوں گے، جن کی مدتِ تعیناتی پانچ سال ہوگی۔ انہوں نے وضاحت کی کہ وزیر اعظم چیف آف ڈیفنس فورسز کی تقرری کریں گے، اور ان کی مدت اس دن سے شروع ہوگی جس دن وہ باضابطہ طور پر عہدہ سنبھالیں گے۔
اعظم نذیر تارڑ نے مزید کہا کہ نئے قانون کے تحت چیئرمین جوائنٹ چیفس آف اسٹاف کمیٹی کا عہدہ ختم کر دیا گیا ہے، اور اب تمام دفاعی فورسز کا کمانڈ و کنٹرول چیف آف ڈیفنس فورسز کے ماتحت ہوگا۔
