اسلام آباد: وزیراعظم شہباز شریف نے کہا ہے کہ شاہ چارلس سوم عوامی خدمت، عالمی شعور اور انسانیت دوستی کی علامت ہیں۔ وہ برطانیہ کے بادشاہ شاہ چارلس سوم کی سالگرہ کے موقع پر اسلام آباد میں منعقدہ تقریب سے خطاب کر رہے تھے۔
وزیراعظم نے کہا کہ سالگرہ کی تقریب میں شرکت ان کے لیے باعثِ اعزاز ہے۔ شاہ چارلس نے دولتِ مشترکہ کے ممالک کو متحد کرنے اور عالمی سطح پر ترقی، ماحولیات اور امن کے فروغ میں نمایاں کردار ادا کیا ہے۔
شہباز شریف نے کہا کہ برطانوی ہائی کمشنر جین میریٹ کی کوششوں سے پی آئی اے کی برطانیہ کے لیے پروازیں بحال ہوئیں، جس پر حکومت پاکستان شکر گزار ہے۔ انہوں نے کہا کہ دہشت گردی آج بھی عالمی امن کے لیے ایک بڑا خطرہ ہے، تاہم پاکستانی مسلح افواج اور قوم متحد ہو کر اس کا مقابلہ کر رہے ہیں۔
وزیراعظم کا کہنا تھا کہ 20 لاکھ پاکستانی نژاد شہری برطانیہ میں مختلف شعبوں میں اپنی خدمات انجام دے رہے ہیں اور دونوں ممالک کے درمیان تعلقات مضبوط کرنے میں اہم کردار ادا کر رہے ہیں۔ انہوں نے کہا کہ تعلیم، صحت اور ہنرمندی کے شعبوں میں برطانوی تعاون سے کئی تاریخی منصوبے مکمل کیے گئے۔
تقریب کے اختتام پر وزیراعظم شہباز شریف نے شاہ چارلس سوم اور ملکہ کو دورہ پاکستان کی دعوت دی۔
تقریب سے خطاب کرتے ہوئے برطانوی ہائی کمشنر جین میریٹ نے کہا کہ برطانیہ پاکستان میں حالیہ دہشت گرد حملوں پر دلی تعزیت کا اظہار کرتا ہے اور پاکستان کے عوام کے ساتھ کھڑا ہے۔ انہوں نے کہا کہ برطانیہ اور پاکستان کے درمیان گہرے دوطرفہ تعلقات ہیں، جبکہ 15 پاکستانی نژاد ارکانِ پارلیمنٹ برطانیہ میں خدمات انجام دے رہے ہیں۔
جین میریٹ نے مزید کہا کہ شاہ چارلس سوم کی ماحولیاتی کاوشیں دونوں ممالک کے درمیان تعلقات کو مزید مضبوط کریں گی۔
