معروف پاکستانی اداکارہ اور سماجی کارکن فریال گوہر نے اپنی ذاتی زندگی اور ماضی سے متعلق دلچسپ انکشافات کیے ہیں۔ ان کا کہنا ہے کہ شادی سے قبل وہ مغربی طرز کا لباس، خصوصاً منی اسکرٹ پہنتی تھیں، لیکن شادی کے بعد زندگی میں آنے والی تبدیلیوں اور محبت کے اثر نے انہیں برقع تک پہننے پر آمادہ کر دیا۔
فریال گوہر نے اپنے خاندانی پس منظر پر روشنی ڈالتے ہوئے بتایا کہ ان کی والدہ کا تعلق بھارتی ریاست گجرات سے تھا، اور ان کا خاندان 1910 سے قبل جنوبی افریقہ منتقل ہو گیا تھا۔ بعد ازاں ان کی والدہ برطانیہ چلی گئیں جہاں ان کے والد—جو اس وقت پاکستانی فوج کے ذریعے سفارت خانے میں تعینات تھے—سے ملاقات ہوئی اور دونوں نے شادی کر لی۔ والدہ کے مغربی ماحول میں پرورش پانے کی وجہ سے فریال خود بھی نوجوانی میں مغربی لباس پہنتی تھیں۔
انہوں نے بتایا کہ 17 سال کی عمر میں انہیں پی ٹی وی میں ایک مختصر کردار ملا جس میں صرف ان کا ہاتھ دکھایا گیا۔ اسی دوران وہ ہاتھوں کی ماڈلنگ سے ڈرامہ انڈسٹری تک پہنچیں جہاں ان کی ملاقات اداکار اور مجسمہ ساز جمال شاہ سے ہوئی، اور دونوں نے شادی کا فیصلہ کیا۔ فریال کے مطابق جمال شاہ کی شخصیت اور ڈمپل نے انہیں بے حد متاثر کیا۔
فریال گوہر نے یہ بھی بتایا کہ شادی کے بعد انہیں سسرال کی طرف سے ان کے فنکارانہ سفر کے باعث سخت رویے کا سامنا کرنا پڑا۔ طلاق کے بارے میں بات کرتے ہوئے انہوں نے کہا کہ تعلق ختم ہونے کی صرف ایک نہیں بلکہ کئی وجوہات تھیں، جنہیں وہ ظاہر نہیں کرنا چاہتیں۔
