پشاور میں صوبائی کابینہ کے اجلاس کی صدارت کرتے ہوئے خیبرپختونخوا کے وزیراعلیٰ سہیل آفریدی نے 9 مئی کو ریڈیو پاکستان پشاور پر ہونے والے حملے کی تحقیقات کے لیے باضابطہ انکوائری کمیشن تشکیل دینے کا اعلان کردیا۔ ان کے مطابق یہ کمیشن سی سی ٹی وی فوٹیج سمیت تمام دستیاب شواہد اکٹھے کرکے جامع رپورٹ تیار کرے گا، جو کابینہ کے سامنے پیش کی جائے گی۔
وزیراعلیٰ نے اجلاس کے دوران بتایا کہ موجودہ حکومت کی اولین ترجیح صوبے کو سود سے پاک نظام کی جانب منتقل کرنا ہے۔ اس مقصد کے لیے جامع پالیسی تیار کی جا رہی ہے اور اسلامک انویسٹمنٹ کے نئے مواقع بھی متعارف کرائے جائیں گے۔
اجلاس میں بتایا گیا کہ صوبائی اسمبلی نے متفقہ طور پر ایک قرارداد منظور کی ہے جس میں بانی پی ٹی آئی اور بشریٰ بی بی کے ساتھ جیل میں مبینہ نامناسب رویے کی نشاندہی کی گئی ہے۔ وزیراعلیٰ نے شکوہ کیا کہ 4.5 کروڑ عوام کے منتخب وزیراعلیٰ ہونے کے باوجود انہیں اپنے قائد سے ملاقات کی اجازت نہیں دی جا رہی، حالانکہ ملاقات پالیسی رہنمائی کے لیے ضروری ہے۔ انہوں نے کہا کہ بانی پی ٹی آئی اور ان کی اہلیہ کو ان کے ذاتی معالج سے بھی ملنے کی اجازت نہیں دی جا رہی۔
سہیل آفریدی نے واضح کیا کہ صوبے میں حکومت کے تمام فیصلے منتخب نمائندوں کی مشاورت سے کیے جائیں گے۔ اختلافات اپنی جگہ، لیکن امن کا قیام سب کا مشترکہ ایجنڈا ہونا چاہیے۔ انہوں نے کہا کہ صوبائی حکومت کرپشن کے خلاف زیرو ٹالرنس پالیسی پر عمل کرتے ہوئے سرکاری فنڈز کو ذاتی تشہیر کے لیے استعمال کرنے کی اجازت نہیں دے گی۔
وزیراعلیٰ نے کابینہ کو ہدایت کی کہ تمام فیصلے میرٹ پر کیے جائیں اور قوانین عوامی مفاد کے مطابق مرتب ہوں۔ انہوں نے کہا کہ ایسے تمام قوانین جو عوامی فائدے کے خلاف ہوں، انہیں ختم کیا جائے۔ تمام قوانین کا ازسرِنو جائزہ لینے، خامیوں کی نشاندہی کرنے اور ضروری ترامیم پیش کرنے کا بھی فیصلہ کیا گیا۔
