لاہور: صوبائی دارالحکومت میں رائیونڈ روڈ جیا بگا کے قریب باراتیوں سے بھری بس ٹرالر سے ٹکرا گئی جس کے نتیجے میں 4 افراد موقع پر ہی جاں بحق جبکہ 19 افراد شدید زخمی ہوگئے۔
ریسکیو ذرائع کے مطابق حادثہ اس وقت پیش آیا جب مخالف سمت سے آنے والے ٹرالر نے بس کو ٹکر ماری۔ زخمیوں میں خواتین اور بچے بھی شامل ہیں۔ 12 زخمیوں کو جنرل ہسپتال جبکہ 7 کو انڈس ہسپتال منتقل کیا گیا ہے، جن میں سے 2 افراد کی حالت تشویشناک بتائی جا رہی ہے۔
عینی شاہدین کا کہنا ہے کہ حادثہ ٹرالر ڈرائیور کی غفلت کے باعث پیش آیا۔ واقعے کی اطلاع ملتے ہی پولیس موقع پر پہنچ گئی اور شواہد اکٹھے کرکے تفتیش کا آغاز کر دیا ہے۔
