راولپنڈی: اردن کے بادشاہ شاہ عبداللہ دوم نے پاکستان کے دفاعی ادارے “گلوبل انڈسٹریل اینڈ ڈیفنس سلوشنز” کا دورہ کیا۔ اس موقع پر ان کے ہمراہ شہزادی سلمیٰ بنت عبداللہ اور سول و عسکری حکام کا اعلیٰ سطح وفد بھی موجود تھا۔
پاک فوج کے شعبہ تعلقات عامہ (آئی ایس پی آر) کے مطابق دورے کے دوران فیلڈ مارشل سید عاصم منیر نے اردن کے بادشاہ اور ان کے وفد کا شاندار استقبال کیا اور دفاعی ادارے کی کارکردگی، مقامی دفاعی پیداوار اور تکنیکی جدت پر تفصیلی بریفنگ دی۔ بریفنگ میں پاکستان اور اردن کے درمیان مستقبل کے دوطرفہ دفاعی تعاون کے امکانات بھی پیش کیے گئے۔
بعد ازاں شاہ عبداللہ دوم نے ٹلہ فیلڈ فائرنگ رینجز کا دورہ کیا، جہاں وزیراعظم شہباز شریف اور آذربائیجان کے وزیر دفاعی صنعت بھی موجود تھے۔ اس موقع پر مشترکہ فائر اینڈ مینوور مشقیں بھی دکھائی گئیں، جن میں زمینی، فضائی اور ملٹی ڈومین آپریشنز کا عملی مظاہرہ شامل تھا۔ ڈرونز، اسپیکٹرم وار فیئر اور مربوط فائر پاور کا مظاہرہ مہمانوں نے سراہا۔
اردن کے بادشاہ نے مشق میں حصہ لینے والے جوانوں اور ہوائی عملے کی تربیت، پیشہ ورانہ مہارت اور عملی صلاحیتوں کو سراہا۔ وزیراعظم شہباز شریف نے اس موقع پر کہا کہ پاکستان اردن اور اردنی عوام کے لیے گہرا احترام اور محبت رکھتا ہے، اور یہ دورہ دونوں ممالک کے دیرینہ تعلقات اور باہمی اعتماد کی عکاسی کرتا ہے۔
آئی ایس پی آر کے مطابق فیلڈ مارشل سید عاصم منیر نے اس موقع پر پاکستان اور اردن کے درمیان مضبوط دفاعی شراکت داری اور مستقبل میں عسکری تعاون کو مزید بڑھانے کے عزم کا اعادہ کیا۔
