راولپنڈی میں پاک فوج کے شعبۂ تعلقاتِ عامہ (آئی ایس پی آر) کے مطابق سکیورٹی فورسز نے خیبر پختونخوا میں دو مختلف انٹیلی جنس بیسڈ آپریشنز کے دوران بھارت کی سرپرستی میں کام کرنے والے دہشتگرد نیٹ ورک کے 23 خوارج کو ہلاک کر دیا ہے۔
آئی ایس پی آر کے مطابق پہلی کارروائی ضلع باجوڑ میں اُس وقت کی گئی جب خوارج کی موجودگی کی مصدقہ اطلاع ملی۔ فورسز نے دہشتگردوں کے ٹھکانوں کو مؤثر انداز میں نشانہ بنایا، جس کے نتیجے میں خوارج کے سرغنہ سجاد عرف ابو زر سمیت 11 دہشتگرد مارے گئے۔
دوسری کارروائی ضلع بنوں میں کی گئی، جہاں انٹیلی جنس اطلاعات کی بنیاد پر آپریشن کے دوران مزید 12 خوارج کو جہنم واصل کر دیا گیا۔ رپورٹ کے مطابق ایک اور دہشتگرد دیسی ساختہ بم نصب کرتے ہوئے خود ہلاک ہوگیا، جس نے شہریوں کو نشانہ بنانے کی کوشش کی تھی۔
آئی ایس پی آر کا کہنا ہے کہ سکیورٹی فورسز بھارت کے حمایت یافتہ دہشتگرد گروہوں کے خلاف آپریشنز مزید تیز کر رہی ہیں۔ دہشتگرد بار بار ناکامی کے بعد نرم اہداف کو نشانہ بنانے کی کوشش کر رہے ہیں لیکن مسلسل اور مؤثر کاؤنٹر ٹیررازم کارروائیوں نے ان کی صلاحیتوں کو شدید نقصان پہنچایا ہے۔
پاک فوج نے واضح کیا ہے کہ وژن “عزمِ استحکام” کے تحت دہشتگردی کے مکمل خاتمے کے لیے کارروائیاں جاری رہیں گی۔
