ماسکو میں شنگھائی تعاون تنظیم (SCO) کے اجلاس کے موقع پر پاکستان کے نائب وزیراعظم و وزیرِ خارجہ اسحاق ڈار کی روسی صدر ولادیمیر پیوٹن سے اہم ملاقات ہوئی۔ ترجمان دفتر خارجہ کے مطابق یہ ملاقات ایس سی او اجلاس کی سائیڈ لائنز پر ہوئی جس میں دیگر ممالک کے سربراہان بھی شریک تھے۔
ملاقات کے دوران روسی صدر نے علاقائی اقتصادی تعاون کو مزید مضبوط بنانے پر زور دیتے ہوئے کہا کہ ایس سی او خطے میں رابطہ کاری، استحکام اور مشترکہ مفادات کے فروغ کے لیے انتہائی اہم کردار ادا کرتی ہے۔ انہوں نے کہا کہ رکن ممالک کے درمیان تعاون کو مزید بڑھانے کی ضرورت ہے تاکہ علاقائی ترقی کے نئے مواقع پیدا ہوسکیں۔
ترجمان دفتر خارجہ کے مطابق گفتگو میں باہمی تعلقات، اقتصادی روابط اور علاقائی تعاون کو وسعت دینے کے امور زیرِ بحث آئے۔ دونوں ممالک نے ایس سی او کے پلیٹ فارم کو مؤثر انداز میں استعمال کرتے ہوئے مستقبل میں تعاون کو مزید فروغ دینے کے عزم کا اظہار کیا۔
