اسلام آباد: وزیراعظم محمد شہباز شریف نے آئندہ برس مون سون کے ممکنہ نقصانات سے بچاؤ کے لیے پیشگی اقدامات کی ہدایت کرتے ہوئے وزارتِ موسمیاتی تبدیلی کے قلیل المدتی منصوبے کی منظوری دے دی۔ وزیراعظم کی زیر صدارت ہونے والے اجلاس میں پاکستان کو درپیش موسمیاتی چیلنجز اور حکومتی حکمتِ عملی پر تفصیلی بریفنگ دی گئی۔
اجلاس میں عالمی موسمیاتی اشاریوں کی روشنی میں آئندہ مون سون کے ممکنہ اثرات پر آگاہ کیا گیا جبکہ وزارتِ موسمیاتی تبدیلی نے قلیل، وسط اور طویل المدتی منصوبوں کی رپورٹ پیش کی۔ وزیراعظم نے قلیل المدتی منصوبے پر فوری عملدرآمد کا حکم دیتے ہوئے ہدایت کی کہ وزارت موسمیاتی تبدیلی، وزارت منصوبہ بندی اور این ڈی ایم اے صوبوں کے ساتھ مل کر مربوط حکمت عملی تشکیل دیں۔
شہباز شریف نے پانی کے بہتر انتظام کے لیے قومی سطح پر مؤثر منصوبہ بندی کو اہم قرار دیتے ہوئے نیشنل واٹر کونسل کے اجلاس کی تیاری کی ہدایت کی۔ انہوں نے کہا کہ ترقی پذیر ملک ہونے کے ناطے پاکستان کو ہر تین سال بعد موسمیاتی آفات کے باعث جی ڈی پی کا بڑا حصہ خرچ کرنا پڑتا ہے، حالانکہ عالمی آلودگی میں پاکستان کا حصہ نہ ہونے کے برابر ہے۔
وزیراعظم کا کہنا تھا کہ قیمتی وسائل ترقیاتی منصوبوں کے بجائے موسمیاتی آفات سے نمٹنے پر خرچ کرنا پڑتے ہیں، اس لیے بروقت تیاری ناگزیر ہے۔ اجلاس میں وفاقی وزراء احسن اقبال، احد خان چیمہ، محمد اورنگزیب، ڈاکٹر مصدق ملک، عطاء اللہ تارڑ اور دیگر اعلیٰ حکام نے شرکت کی۔
