گلگت: گلگت بلتستان (جی بی) کی موجودہ حکومت اپنی پانچ سالہ مدت مکمل کر کے 24 نومبر کو اختتام پذیر ہو جائے گی۔ جی بی اسمبلی کے ذرائع کے مطابق وزیراعلیٰ حاجی گلبر خان 24 نومبر کی رات 12 بجے اپنے عہدے سے سبکدوش ہو جائیں گے اور ان کی کابینہ خود بخود تحلیل ہو جائے گی۔
ذرائع نے بتایا کہ 2020 کے انتخابات میں پاکستان تحریک انصاف کی حکومت قائم ہوئی تھی۔ سابق وزیراعلیٰ خالد خورشید کو جعلی ڈگری کیس میں 4 جولائی 2023 کو نااہل قرار دیا گیا تھا۔ یکم دسمبر 2020 کو منتخب ہونے والے خالد خورشید نے 2 سال، 7 ماہ اور 4 دن تک اقتدار سنبھالا۔
خالد خورشید کی نااہلی کے بعد تحریک انصاف فارورڈ بلاک کے حاجی گلبر خان 13 جولائی 2023 کو جی بی کے وزیراعلیٰ منتخب ہوئے۔ جی بی اسمبلی کی پانچ سالہ مدت کے خاتمے کے قریب نگران حکومت کے قیام کے لیے اقدامات تیز کر دیے گئے ہیں۔
جی بی اسمبلی ذرائع کے مطابق نگران وزیراعلیٰ کے لیے کئی امیدوار سرگرم ہیں۔ ممکنہ فہرست میں راجہ نظیم الامین، بریگیڈیئر (ر) بشارت، شیر بہادر انجم، محمد علی قائد اور وقار منڈوق کے نام شامل ہیں۔ اس کے علاوہ جوہر علی راکی، میر مصطفیٰ مدنی، محمد حسن حسرت اور غلام عباس بھی نگران وزیراعلیٰ کے امیدوار ہیں۔
ذرائع کا کہنا ہے کہ وزیراعلیٰ اور اپوزیشن لیڈر کی متعدد ملاقاتوں کے باوجود نگران وزیراعلیٰ کے نام پر ابھی تک اتفاق نہیں ہو سکا۔ اگر دونوں جانب سے نام پر اتفاق نہ ہوا تو نگران وزیراعلیٰ کے لیے فیصلہ وزیر اعظم پاکستان کریں گے۔
