لکی مروت: سیکیورٹی فورسز نے لکی مروت کے علاقے پہاڑ خیل پکہ اور ڈیرہ اسماعیل خان میں خفیہ اطلاعات پر دو کامیاب کارروائیاں کرتے ہوئے مجموعی طور پر 13 دہشت گردوں کو ہلاک کر دیا، جن میں 2 اہم کمانڈر بھی شامل ہیں۔
سی ٹی ڈی کے مطابق سیکیورٹی فورسز نے قابلِ اعتماد انٹیلی جنس معلومات کی بنیاد پر صبح 7 بج کر 30 منٹ پر کارروائی کا آغاز کیا۔ سب ڈویژن بیٹنی میں 20 سے 30 دہشت گرد چھوٹے گروپوں کی صورت میں پہاڑ خیل کی جانب بڑھ رہے تھے، جس پر فورسز اور پولیس نے بھرپور جوابی کارروائی کی۔
آپریشن کے دوران دہشت گردوں کے ٹھکانوں پر شدید فائرنگ اور گولہ باری کی گئی۔ ہلاک ہونے والے 10 دہشت گردوں میں ٹیپو گل گروپ کے 2 اہم کمانڈر—کمانڈر نیاز علی المعروف اکاشا اور کمانڈر عبداللہ المعروف شپونکوئی—بھی شامل ہیں۔ کلیئرنس آپریشن میں 7 دہشت گردوں کی لاشیں برآمد ہوئیں جبکہ 3 لاشیں بیٹنی پہاڑوں کے قریب ہونے اور فائرنگ کے باعث نکالی نہ جا سکیں۔
دوسری جانب ڈیرہ اسماعیل خان میں خفیہ اطلاعات پر ایک اور کارروائی کے دوران تین خوارج مارے گئے۔ آئی جی پولیس ذوالفقار حمید کے مطابق کارروائی میں 5 دہشت گرد زخمی ہوئے جبکہ ایک سہولت کار کو گرفتار کیا گیا۔ ان کا کہنا تھا کہ دہشت گردی کے خاتمے کے لیے ایسی کارروائیاں جاری رہیں گی۔
آئی جی پولیس نے کہا کہ خیبر پختونخوا پولیس عوام کی جان و مال کے تحفظ کے لیے ہمہ وقت تیار ہے، اور لکی مروت پولیس نے اعلیٰ پیشہ ورانہ مہارت اور غیر معمولی جرات کا مظاہرہ کیا ہے۔
